မုံရွာ-မန္တလေးလမ်းမကြီးနှင့် ထီးဆောင်း-အရာတော်လမ်းမကြီးတို့ကို ဖြတ်သန်းသွားလာခြင်းမပြုရန် မြင်းမူး မြို့ပြပြောက်ကျားတပ် Black Eagle Defence Force – MMU က အရေးပေါ်သတိပေးချက် ထုတ်ပြန်လိုက်သည်။
ယနေ့(ဇန်နဝါ်ရီ ၃)ရက်နံနက် ၈ နာရီ ၁၅ မိနစ်မှ စတင်ပြီး မုံရွာ-မန္တလေး လမ်းမကြီးနှင့် ထီးဆောင်း – အရာတော် လမ်းမကြီးတို့ကို အသုံးမပြုရန် ၎င်းတို့ကမေတ္တာရပ်ခံထားသည်။
“အချိန် မရွေးတိုက်ပွဲ ဖြစ်နိုင်ပါသောကြောင့် မိဘပြည်သူများ မတော်တဆထိခိုက် နစ်နာမှုမျိုး မရှိစေလို၍ လမ်းမကြီး ၂ ခုအား အသုံးမပြုခြင်း၊ သွားနေပါက ရောက်သည့်နေရာတွင် ရပ်တန့်ထားခြင်းမျိုး ပြုလုပ်ရန် အထူး သတိပေးကြေညာအပ်သည်”ဟု Black Eagle က ဆိုသည်။
ကြေညာချက် ထုတ်ပြန်ချိန်မှစပြီး ပြန်လည် အသုံးပြုနိုင်ကြောင်း ကြေညာချက်ကို စိတ်ရှည်စွာ စောင့်ဆိုင်း ပေးရန်နှင့် မိမိ၏မိသားစု၊ အသိမိတ်ဆွေများ လမ်းကြောင်းပေါ်တွင် ရှိနေပါက ဖုန်းဆက် အကြောင်းကြားပေးရန် မေတ္တာရပ်ခံထားသည်။
မုံရွာ-မန္တလေးလမ်းနှင့် ထီးဆောင်း-အရာတော်လမ်းပိုင်းများတွင် အကြမ်းဖက် စစ်ကောင်စီတပ်များအား ဒေသတွင်းပြည်သူ့ကာကွယ်ရေးအဖွဲ့များက မကြခဏ ခုခံတိုက်ခိုက်လျက်ရှိသည်။
ဒီဇင်ဘာလ ၃၁ရက် ည ၉:၁၄နာရီအချိန်ကလည်း စစ်ကိုင်းမှ ရွှေဘိုသို့ ထွက်ခွာလာသည့် စစ်ကောင်စီထောက်ပို့စစ်ယာဉ်တန်းကို စစ်ကိုင်း-ရွှေဘိုကားလမ်းမကြီးပေါ် ဝက်လက်မြို့နယ် ရွာသာကြီးမြောက်ဘက် ရွာတော်ကုန်း မူး ရွှေလှံတံတား အနီးတွင် ဝက်လက်မြို့နယ် တပ်ရင်း ၁ ပြည်သူ့ကာကွယ်ရေးအဖွဲ့မှ မိုင်းဆွဲတိုက်ခိုက်ခဲ့ရာ ထိခိုက်သေဆုံးမှုများ ရှိခဲ့သည်။