လွတ်လပ်ရေးနေ့မှာ ပြစ်ဒဏ်လွတ်ငြိမ်းသက်သာခွင့်နဲ့ လွှတ်ပေးဖို့မရှိသေး

စစ်အာဏာသိမ်းတာကိုဆန့်ကျင်တာကြောင့် မတရားဖမ်းဆီးထောင်ချခံရသူအချို့ကို ဒီနေ့ လွတ်လပ်ရေးနေ့မှာ လွတ်ငြိမ်းသက်သာခွင့်နဲ့လွတ်မြောက်လာလိမ့်မယ်လို့ မျှော်လင့်ထားကြပေမယ့် လက်ရှိအခြေအနေထိ လွှတ်ဖို့အစီအစဉ်မရှိသေးဘူးလို့ သိရပါတယ်။

လက်ရှိအချိန်ထိလည်းအင်းစိန်ထောင်ရှေ့မှာ ယခင်လွတ်ငြိမ်းသက်သာခွင့်ပေးတုန်းကလို လာရောက်ကြိုဆိုကြသူအများအပြားကိုမတွေ့ရပါဘူး။

ပုံမှန်အားဖြင့်တော့ နိုင်ငံရဲ့နေ့ထူးနေ့မြတ်တွေမှာလွတ်ငြိမ်းသက်သာခွင့်ပေးတာမျိုးရှိခဲ့ပေမယ့် ဒီနေ့မှာတော့ ပြစ်ဒဏ်လွတ်ငြိမ်းခွင့်နဲ့ လွှတ်ဖို့မရှိသေးကြောင်း အင်းစိန်ထောင်မှာအမှုကိစ္စတွေကို လိုက်ပါဆောင်ရွက်ပေးနေကြတဲ့ ရှေ့နေအသိုင်းအဝိုင်းဆီက သိရပါတယ်။

ပြီးခဲ့တဲ့ ရက်ပိုင်း ဒီဇင်ဘာလကုန်ပိုင်းက နာမည်ကြီး အနုပညာရှင်တွေအပါအဝင် စစ်အာဏာရှင်ဆန့်ကျင်ရေးမှာပါဝင်သူ တွေကိုခပ်မြန်မြန် ထောင်ချတာတွေရှိခဲ့တာကြောင့် လွတ်လပ်ရေးနေ့မှာ ပြန်လည်လွတ်မြောက်လာကြမလားဆိုပြီးခန့်မှန်းတွက်ချက်ကြသူတွေရှိခဲ့တာပါ။

Public Service Announcement

မြန်မာနိုင်ငံမှာ စစ်အာဏာသိမ်းတဲ့ဖေဖော်ဝါရီလ ၁ရက်ကစတင်ပြီး မနေ့ကအထိ မတရားဖမ်းဆီးချုပ်နှောင်ခံရသူဟာ စုစုပေါင်း ၈၃၇၆ ဦးရှိပြီး အဲဒီအထဲက ၅၀၇ ဦးဟာထောင်ချခံထားရတယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) ရဲ့စာရင်းတွေအရသိရပါတယ်။