စစ်ကိုင်းတိုင်း၊ ရွှေဘိုမြို့နယ်အတွင်းရှိ ကျေးရွာတစ်ရွာတွင် အကြမ်းဖက်စစ်ကောင်စီတပ်၏ ပစ်ခတ်မှုကြောင့် ကောက်ရိတ်နေပြည်သူနှစ်ဦးသေဆုံးခဲ့ပြီး ပြည်သူများလည်းထွက်ပြေးနေရကာ တောင်သူများကောက်ရိတ်သိမ်းရန် အခက်အခဲများကြုံတွေ့နေရကြောင်း ဒေသခံများက ပြောသည်။
ဇန်နဝါရီလ ၆ ရက်နေ့ဝန်းကျင်က ရွှေဘိုမြို့နယ်၊ ရုံးတောကျေးရွာနှင့် ကြောင်လျှာတော ကျေးရွာများသို့စစ်ကောင်စီတပ်သားများနှင့်၎င်းတို့လက်အောက်ခံပျူစောထီးများ ပူးပေါင်းကာ စစ်ကြောင်းထိုးခဲ့ကြောင်း၊ထိုအချိန်ကောက်လှိုင်း(ကောက်ရွေးထုံး)တင်နေသောပြည်သူနှစ်ဦးအား ပစ်ခတ်ခဲ့သည်ဟု သိရကြောင်း ဒေသခံများက ပြောသည်။
“တစ်ဦးကသေနတ်ဒင်နဲ့ထုသတ်လို့ မျက်နှာတစစီ ဖြစ်သွားတယ်။ နောက်တစ်ဦးကတော့ နဖူးကျည်ဆန်မှန်သွားတယ်လို့ကြားတယ်”ဟု ဒေသခံတစ်ဦးက ပြောသည်။
ထို့ကြောင့်အဆိုပါကျေးရွာမှပြည်သူများသည်နယ်ချင်းဆက်နေသည့်ဒီပဲယင်းမြို့နယ်အတွင်းထွက်ပြေးတိမ်းရှောင် ခိုလှုံနေရပြီး ရွာလုံးကျွတ်တိမ်းရှောင်ရ၍ နှစ်ရွာပေါင်းလူဦးရေ (၂၀၀၀)ဝန်းကျင်ခန့်ရှိသည်။ ရုတ်တရက်တိမ်းရှောင်ရသည့်အတွက် အစားအစာ၊အဝတ်အထည်နှင့် ကျန်အသုံးအဆောင်များလိုအပ်နေသည်ဟု ဒေသခံများကပြောသည်။
ထို့အပြင် ရွှေဘိုပေါ်ဆန်းစိုက်ရာ ရွှေဘိုနယ်၏ အချို့နေရာများတွင် စစ်ကောင်စီတပ်သားများ၊ ၎င်းတို့လက်အောက်ခံ ပျူစောထီးများက တစ်ဧကလျှင် သုံးသိန်းကျပ်တောင်းယူပြီးမှ စိုက်ပျိုးခွင့်ပြုခဲ့သောစပါးများယခုအခါ ရိတ်သိမ်းချိန်ရောက်လာပြီဖြစ်သော်လည်း တောင်သူအများစုသည် နေရပ်သို့မပြန်ရဲဘဲရှိနေကြသည်။ တောင်သးအချို့မှာအရဲစွန့်၍ တိမ်းရှောင်နေရာမှ ရိတ်သိမ်းနေရပြီး စပါးရိတ်သိမ်းနေချိန် အကြမ်းဖက်စစ်ကောင်စီတပ်သားများစစ်ကြောင်းထိုးလာပါက ထပ်မံထွက်ပြေးတိမ်းရှောင်ကြရကြောင်း ရွှေဘိုမြို့မှတိမ်းရှောင်လာသူများအား အကူအညီပေးနေ
သည့် ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။