အတုအယောင်တရားစီရင်မှုက နိုင်ငံခြားရေးအခြေအနေကို ပိုမိုဆိုးရွားစေဟုဆို
နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို တရားမဝင်အာဏာသိမ်းစစ်ကောင်စီက ပြစ်ဒဏ် ထပ်မံချမှတ်လိုက်ခြင်းကို ပြင်သစ်နိုင်ငံက ရှုတ်ချကြောင်း ယနေ့(ဇန်နဝါရီ ၁၁ရက်) သတင်းထုတ်ပြန်သည်။
အတုအယောင်တရားစီရင်မှုသည် အလွန်စိုးရိမ်ဖွယ်ကောင်းနေပြီဖြစ်သော နိုင်ငံရေးအခြေအနေကို ပိုမိုဆိုးရွား စေကြောင်း ပြင်သစ်နိုင်ငံခြားရေးဌာန ပြောရေးဆိုခွင့်ရှိသူက ထုတ်ပြန်သည်။
ဥပဒေမဲ့အာဏာသိမ်းထားသည့် စစ်ကောင်စီက ဇန်နဝါရီ ၁၀ရက်တွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို သွင်းကုန်၊ ပို့ကုန်ဥပဒေ၊ ဆက်သွယ်ရေးဥပဒေနှင့် သဘာ၀ဘေးစီမံဥပဒေ ပုဒ်မများကို ဖောက်ဖျက်ကျူးလွန်သည်ဆိုကာ စုစုပေါင်း ၄ နှစ် ထပ်မံချမှတ်ခဲ့သည်။
Public Service Announcement
ဥရောပသမဂ္ဂနှင့် ၎င်း၏အဖွဲ့ဝင်နိုင်ငံများက ဒီဇင်ဘာ ၆ ရက်တွင် သတိပေးထားပြီးဖြစ်သည့်အတိုင်း မြန်မာနိုင်ငံ၏အကျပ်အတည်းမှ လွတ်မြောက်ရေးလမ်းစသည် ပဋိပက္ခတွင်ပါဝင်သူအားလုံးပါဝင်သည့် နိုင်ငံရေးတွေ့ဆုံဆွေးနွေးမှုစတင်ရန်ဖြစ်ကြောင်း ထုတ်ပြန်ချက်၌ ဖော်ပြသည်။
ထို့အပြင် ကယား၊ ကရင်နှင့် ချင်းပြည်နယ်များတွင် စစ်တပ်က အရပ်သားများအပေါ် ကျူးလွန်သော တိုက်ခိုက်မှု များကို ချက်ချင်းရပ်ဆိုင်းခြင်းနှင့် အာဏာသိမ်းချိန်ကစ၍ ဖမ်းဆီးထားသော နိုင်ငံရေး အကျဉ်းသားအားလုံးကို ချွင်းချက်မရှိ လွှတ်ပေးခြင်းတို့လုပ်ဆောင်ရန် ပြင်သစ်က တောင်းဆိုသည်။
အားလုံးပါဝင်သော နိုင်ငံရေးဆွေးနွေးမှု အကောင်အထည်ဖော်ရေး အပါအဝင် အာဆီယံသဘောတူညီချက် ငါးချက်ကို အကောင်အထည်ဖော်ရန် ပြင်သစ်နိုင်ငံသည် အာဆီယံကို အပြည့်အဝ ထောက်ခံအားပေးနေကြောင်း ဆက်လက်ဖော်ပြသည်။
