တမူးမြို့နယ်ရှိ အုတ်ဖိုကန်ဘောင် အကျဉ်းရဲဘက်စခန်းကို ယမန်နေ့( ဇန်နဝါရီ ၁၀)မနက်က ဝင်ရောက်တိုက်ခိုက်ခဲ့ရာ ထောင်မှူးအပါအဝင် လေးယောက်သေဆုံးပြီး PDFနှစ်ဦး ကျဆုံးခဲ့သည်ဟု ဒေသခံကာကွယ်ရေးတပ်ဖွဲ့တစ်ခုဖြစ်သည် PDF (တမူး) တပ်ရင်း -၁ မှ တာဝန်ရှိသူတစ်ဦးက ပြောသည်။
ထောင်မှူးအိမ်ကို ဝင်ရောက်စီးနင်းပြီး အကြမ်းဖက်စစ်ကောင်စီတပ်သားများကို လက်နက်ချရန် ပြောဆိုခဲ့သော်လည်း ထောင်မှူးဇနီးနှင့် အကြမ်းဖက်စစ်ကောင်စီတပ်များက ပြန်လည်ပစ်ခတ်ခဲ့ရာမှ တိုက်ပွဲဖြစ်ပွားခဲ့ခြင်းဖြစ်သည်ဟုဆိုသည်။
“ကျနော်တို့ မနေ့က ကိစ္စနဲ့ပါတ်သက်ပြီး အလုပ်လေးရှိနေသေးလို့ပါ။ ပြီးရင် ကျနော် သတင်းအပြည့်စုံ ထုတ်ပြန်ပေးပါ့မယ်” ဟု PDF(တမူး) တပ်ရင်း-၁ မှ တာဝန်ရှိသူတစ်ဦးက People’s Spring ပြောသည်။
ထိုဖြစ်စဉ်တွင် ထောင်မှူး ဦးအောင်ကျော်ဆန်းနှင့် ၎င်းဇနီးအပါအဝင် လေးဦးသေဆုံးခဲ့ပြီး PDFဘက်မှာ ရဲဘော် ၂ဦးကျဆုံးပြီး ၄ဦး ဒဏ်ရာရရှိခဲ့သည်ဟု ဒေသတွင်း မီဒီယာဖြစ်သော Zalen သတင်းဌာနတွင်ဖော်ပြထားသည်။
“ထောင်ပိုင် မိသားစုက ပြန်လည်ခုခံလို့ ပစ်ခတ်မူဖြစ်တာလို့ကြားတယ်။ မိသားစုလိုက်သေဆုံးသွားတယ်လို့လဲ ကြားတယ်၊ လူနာတင်ယာဉ် သုံးလေးစီးလောက်လာသယ်တာတော့ တွေ့တယ်”ဟု ဒေသခံတစ်ဦးကပြောသည်။
ပစ်ခတ်မူဖြစ်ပွားသည့် အကျဉ်းရဲဘက်စခန်းသည် စစ်ကိုင်းတိုင်း၊ တမူးမြို့နယ်၊ အုတ်ဖိုကန်ဘောင် စိုက်ပျိုးမွေးမြူရေးနှင့်အသက်မွေးမှုအတက်သင်စခန်းဖြစ်သည်။