ကလေးငယ်သုံးဦးအပါအဝင် ငါဦးဒဏ်ရာရ၊ နေအိမ်ခြောက်လုံး မီးလောင်
စစ်ကိုင်းတိုင်း ကသာမြို့အထက်ပိုင်း မိုးတားကြီးရွာနှင့်အနီးကို အကြမ်းဖက်စစ်ကောင်စီတပ်က ဂျက်လေယာဥ်သုံးစီးဖြင့် ဗုံးကြဲတိုက်ခိုက်ရာ ကလေးငယ်သုံးဦးအပါအဝင် ဒေသခံပြည်သူငါးဦးထိခိုက်ဒဏ် ရာရရှိပြီး နေအိမ်ခြောက်လုံး မီးလောင်ခဲ့ကြောင်း မြို့လှ PDF က ထုတ်ပြန်သည်။
ယနေ့(ဇန်နဝါရီ ၁၂ ရက်)နေ့လယ် ၁၂နာရီ ၄၈ မိနစ်တွင် အကြမ်းဖက်စစ်ကောင်စီတပ်က ဂျက်လေယာဥ် သုံးစီးဖြင့် ကသာမြို့၏အထက် မိုးတားကြီးရွာနှင့် အနီးပတ်ဝန်းကျင်တစ်လျှောက် ဗုံးကြဲတိုက်ခိုက်ခဲ့ခြင်းဖြစ်သည်။
“ဗုံးကြဲမှုကြောင့် ကလေးငယ် သုံးဦးအပါအဝင် စုစု ပေါင်းအပြစ်မဲ့ဒေသခံ ငါးဦး ထိခိုက်ဒဏ်ရာရခဲ့သည်။ သေဆုံးသူဦးရေရှိမရှိ ဆက်လက်ရှာဖွေနေသည်”ဟု မြို့လှ PDFက ဆိုသည်။
အကြမ်းဖက်စစ်ကောင်စီ၏ လေယာဥ်သုံးစီးသည် စုစုပေါင်း ဗုံး ၁၂ လုံးခန့်ကြဲချခဲ့ပြီး မိုးတားကြီးရွာ စျေးတန်း၊ ယင်းရွာအနီးရှိ ကချင်စုနှင့် ဗျူဟာရောင်ခြည်ဘုန်းကြီးကျောင်းအနီးမှ ဒေါ်အောင်လျှိုအပါအဝင် သုံးနေရာ ဗုံးကြဲခံခဲ့ရသည်ဟု ထုတ်ပြန်ချက်၌ ပါရှိသည်။
မိုးတားကြီးရွာတွင် အိမ်ငါးလုံး နှင့် ဓမ္မာရုံတစ်ခု၊ ကချင်စု၌ နေအိမ်ဝတစ်လုံး စုစုပေါင်း အိမ်ခြောက်လုံးနှင့် ဘာသာရေးအဆောက်အဦး ဓမ္မရုံတစ်ခု မီးလောင်ပျက်စီးခဲ့သည်။
အကြမ်းဖက်စစ်ကောင်စီတပ်သည် ၎င်းတို့အား တော်လှန်နေသည့် ပြည်သူ့တပ်ဖွဲ့များအပါအဝင် တိုင်းရင်းသားလက်နက်ကိုင်အဖွဲ့များအား မြေပြင် တိုက်ခိုက်ရာတွင် အထိနာနေသဖြင့် လေကြောင်း တိုက်ခိုက်မှုများ ဆက်တိုက်အသုံးပြုနေရသည်။