တောင်ဥက္ကလာပမြို့နယ် အထွေထွေသပိတ်ဦးဆောင်ကော်မတီတစ်ဦးနှင့် ပြည်သူ့ကာကွယ်ရေးတပ်ဖွဲ့ဝင်သုံးဦး (ပ.က.ဖ)စစ်ကောင်စီ ၏ဖမ်းဆီးခြင်းခံလိုက်ရကြောင်း တောင်ဥက္ကလာပမြို့နယ် ပြည်သူ့ကာကွယ်ရေးတပ်ဖွဲ့ ဒုတာဝန်ခံက လူထုနွေဦးသို့ အတည်ပြုပြောကြားသည်။
ဖမ်းဆီးခံရသူများတွင် မြို့နယ်အထွေထွေသပိတ်ဦးဆောင်ကော်မတီဝင်လည်းဖြစ် မြို့နယ်စည်ပင်သာယာရေးကော်မတီဝင်ဟောင်းတစ်ဦးလည်းဖြစ်သည့် ကိုလင်းထက်နှင့်မြို့နယ် ပ.က.ဖအဖွဲ့ဝင် သုံးဦး ဖမ်းဆီးခံရခြင်းဖြစ်သည်ဟု၎င်းကပြောသည်။
“ ဘယ်လိုဖမ်းဆီးခံရသလဲဆိုတာတော့ ခုထိမသိရသေးဘူး။ သူ(ကိုလင်းထက်)နဲ့အတူ တ ခြားသူတွေလည်းအဖမ်းခံရပါတယ်။ ပကဖ တချိူ့ပေါ့” ဟု တောင်ဥက္ကပမြို့နယ်(ပကဖ)ဒုတာဝန်ခံက ပြောသည်။
သပိတ်ဦးဆောင်ကော်မတီဝင် ကိုလင်းထက်ကို ဇန်နဝါရီ ၁၀ ရက်က ရန်ကုန်မြို့တစ်နေရာတွင် စစ်ကောင်စီတပ်က ဖမ်းဆီးခဲ့ခြင်းဖြစ်ပြီး ၎င်းနှင့်အတူ မြို့နယ်(ပကဖ)အဖွဲ့ဝင်တစ်ဦးကိုပါ အဖမ်းခံရခြင်းဖြစ်ကြောင်း ဒုတာဝန်ခံက ဆက်ပြောသည်။
Public Service Announcement
ကိုလင်းထက်နှင့် မြို့နယ်ပြည်သူကာကွယ်ရေးတပ်ဖွဲ့ဝင်တစ်ဦး အဖမ်းခံရပြီးနောက်ရက်တွင် ပကဖအဖွဲ့ဝင် နောက်ထပ်နှစ်ဦး ဆက်လက်ဖမ်းဆီးခံခဲ့ရခြင်းဖြစ်ကြောင်း တောင်ဥက္ကလာပမြို့နယ် ပြည်သူ့ကာကွယ်ရေးတပ်ဖွဲ့ထံမှ သိရသည်။
ဖမ်းဆီးခံရသူများကို အကြမ်းဖက်စစ်ကောင်စီတပ်မှ မည်သည့်နေရာသို့ခေါ်ဆောင်သွားသည်၊ မည်သည့်အခြေအနေရှိနေသည့် စသည်တို့အား မသိရသေးဘဲ ယခု(ဇန်နဝါရီ ၁၃)အချိန်ထိအဆက်အသွယ်မရရှိသေးပေ။
