အမေရိကန်အစိုးရဟာ တရုတ်ကိုထိန်းချုပ်ဖို့ အင်ဒိုပစိဖိတ်ဒေသအတွက် စစ်အသုံးစရိတ် တိုးမြှင့်လိုက်တဲ့အခြေအနေဟာ မြန်မာနိုင်ငံအပေါ် သက်ရောက်မှု ရှိလာမယ်လို့ စစ်ကောင်စီရဲ့ ပြောရေးဆိုခွင့်ရှိသူ က ဒီနေ့သတင်းစာရှင်းလင်းပွဲမှာပြောလိုက်ပါတယ်။
သမ္မတ ဂျိုးဘိုင်ဒင်ဟာ ပြီးခဲ့တဲ့ ဒီဇင်ဘာလအတွင်းက NDAA လို့ခေါ်တဲ့ အမေရိကန် အမျိုးသားကာကွယ်ရေးဥပဒေမှာ ပုံမှန်သုံးနေတဲ့ စစ်ရေးအသုံးစရိတ်ကို ၅ ရာခိုင်နှုန်းတိုးမြှင့်လိုက်တာပါ။
အဲဒီစစ်အသုံးစရိတ်မှာ အင်ဒိုပစိဖိတ်ဒေသအတွက် အမေရိကန် ဒေါ်လာ ၇ ဒဿမ ၁ ဘီလီယံကို သုံးစွဲမှာဖြစ်ပါတယ်။
အမေရိကန်ဟာ အင်ဒိုပစိဖိတ်ဒေသအတွက် ဒေါ်လာ ၇ ဘီလီယံကျော်သုံးစွဲပြီး ဥရောပနဲ့ ယူကရိန်းအတွက် ဒေါ်လာ ၄ ဘီလီယံကျော်သာသုံးစွဲမှာကိုတွေ့ရတယ်လို့စစ်ကောင်စီပြောရေးဆိုခွင့်ရှိသူကပြောပါတယ်။
Public Service Announcement
ဒါကိုကြည်ပြီး အမေရိကန် ဘယ်ဒေသကိုစိတ်ဝင်စားလဲဆိုတာကိုသိနိုင်တယ်လို့လည်းပြောပါသေးတယ်။
” အင်ဒိုပစိဖိတ်ဒေသဆိုတာတည့်တည့်ပြောရင် တရုတ်ကိုထိန်းချုပ်ဖို့ပါပဲ” လို့ စစ်ကောင်စီပြောရေးဆိုခွင့်ရှိသူ ဆိုပါတယ်။
တရုတ်ဟာ မြန်မာနိုင်ငံရဲ့အိမ်နီးချင်းနိုင်ငံဖြစ်ပြီး မဟာမိတ်နိုင်ငံလည်းဖြစ်တာကြောင့် ဒီအခြေအနေဟာ မြန်မာအပေါ်ကိုလည်းသက်ရောက်မှုရှိလာမယ်လို့ဆိုပါတယ်။
လက်ရှိမှာတော့ မြန်မာကိုအာဆီယံ မျက်နှာစာကနေ ဖိအားပေးနေတယ်လို့ စစ်ကောင်စီပြောရေးဆိုခွင့်ရှိသူကပြောပါသေးတယ်။
ဒါကြောင့် အမေရိကန်အစိုးရ တာဝန်ရှိသူတွေဟာ အာဆီယံဒေသတွင်းက နိုင်ငံအချို့ကို မကြာခဏလာရောက်နေတာတွေ့ရတယ်လို့ ပြောပါတယ်။
“ပြောရရင်အကြောင်းမဲ့ ငွေကုန်ခံ ၊အချိန်ကုန်ခံပြီး ဘယ်သူမှလာစရာမလိုဘူး”လို့စစ်ကောင်စီပြောရေးဆိုခွင့်ရှိသူက ဆိုပါတယ်။
အမေရိကန်အစိုးရဟာ NDAA မှာ NUG အစိုးရကို တရားဝင်ဖြစ်လာဖို့ကူညီပေးဖို့ထည့်သွင်းရေးဆွဲထားပါတယ်။
