မြန်မာပြည်သူများအကျိုးအတွက် ပုံမှန်အခြေအနေပြန်လည်ရရှိရေး အတူတကွနီးကပ်စွာပူးပေါင်းဆောင်ရွက်ရန် ကုလသမဂ္ဂအထူးကိုယ်စားလှယ်နှင့် ဗီယက်နမ်နိုင်ငံခြားရေးဝန်ကြီးတို့အကြား သဘောတူခဲ့ကြောင်း ဟနွိုင်းအခြေစိုက် VNA သတင်းဌာနက ဖော်ပြသည်။
ကုလသမဂ္ဂအထွေထွေအတွင်းရေးမှူးချုပ်၏ အထူးကိုယ်စားလှယ် Noeleen Heyzer နှင့် ဗီယက်နမ်နိုင်ငံခြားရေးဝန်ကြီး Bui Thanh Son တို့သည် ဇန်နဝါရီ ၁၄ ရက်တွင် အွန်လိုင်းမှတစ်ဆင့် မြန်မာ့အရေးကို ဆွေးနွေးခဲ့ပြီး လက်ရှိ မတည်ငြိမ်မှုများအပေါ် စိုးရိမ်ကြောင်းနှင့် အကြမ်းဖက်မှု များ အဆုံးသတ်ရေး ဦးစားပေး၊ အရေးပေါ်လုပ်ဆောင်ရန်လိုအပ်ကြောင်း အလေးပေးဆွေးနွေးသည်။
မြန်မာပြည်သူများအကျိုးနှင့်ဆီလျော်သည့် ငြိမ်းချမ်းသော၊ အားလုံးပါဝင်ပြီး ရေရှည်ဖြေရှင်းနိုင်ရေး တွေ့ဆုံဆွေးနွေးမှုမြှင့်တင်ခြင်းနှင့် ယုံကြည်မှုတည်ဆောက်ခြင်းတို့ လုပ်ဆောင်စဉ်တွင် လူသားချင်းစာနာမှုအထောက်အပံ့ကိုလည်း ဦးစားပေး၊ အရေးပေါ်လုပ်ဆောင်ရမည်ဟု ထည့်သွင်းဆွေးနွေးသည်။
Public Service Announcement
ဗီယက်နမ်နှင့် အာဆီယံတို့သည် မြန်မာကိုအာဆီယံမိသားစုဝင်အဖြစ်အမြဲတမ်းစဉ်းစားပြီး အခြေအနေကို အနီးကပ်စောင့်ကြည့်နေပြီး မြန်မာနိုင်ငံ၏ လွတ်လပ်မှု၊ အချုပ်အခြာအာဏာ၊ ပိုင်နက်နယ်မြေစိုးမိုးမှုတို့ကို လေးစားခြင်းအခြေခံအပေါ် ကူညီနေကြောင်း နိုင်ငံခြားရေးဝန်ကြီး Bui Thanh Sonက ပြောသည်။
ထို့အပြင် မြန်မာ့အရေးတွင် ဘက်စုံတိုးတက်မှုရှိသည့် ချဉ်းကပ်မှုလိုအပ်နေပြီး အဖြေရှာခြင်းအားလုံးသည် ပြည်သူလူထုကို ဗဟိုပြုရမည်ဟု ၎င်းက ဆိုသည်။
နိုင်ငံတကာအသိုင်းအဝန်းနှင့် ကုလသမဂ္ဂအနေဖြင့်လည်း အာဆီယံ၏ဗဟိုကျမှုအခန်းကဏ္ဍနှင့် ကြိုးပမ်းအားထုတ်မှုများနှင့် မြန်မာနိုင်ငံတွင် တွေ့ဆုံဆွေးနွေးရေး၊ ရင်ကြားစေ့ရေးအတွက် ဦးစားပေးလုပ်ဆောင်စေလိုကြောင်း ဗီယက်နမ်နိုင်ငံခြားရေးဝန်ကြီးက ပြော သည်။
