RCSSဥက္ကဋ္ဌ ဗိုလ်ချုပ်ကြီးယွက်စစ်၏ စစ်ကောင်စီကို ဆန့်ကျင်ကြောင်းပြောဆိုချက်များ ပြောင်းလဲသွား
အကြမ်းဖက်စစ်ကောင်စီခေါင်းဆောင်မင်းအောင်လှိုင်၏ နိုင်ငံရေးဆွေးနွေးခြင်း ဖိတ်ခေါ်ချက်ကို ကြိုဆိုကြောင်း ရှမ်းလက်နက်ကိုင်အဖွဲ့(RCSS)က ယနေ့ ထုတ်ပြန်ကြေညာခဲ့သည်။
စစ်တပ်အာဏာသိမ်းသည့် နေ့၌ပင် အာဏာသိမ်းမှုကိုဆန့်ကျင်ကန့်ကွက်ကြောင်း ကြေညာခဲ့သည့် RCSSသည် အာဏာသိမ်းပြီးနောက်ပိုင်း စစ်ကောင်စီနှင့် တိုက်ပွဲဖြစ်ပွားမှုမရှိသည့်အပြင် ယခုအခါ စစ်ကောင်စီနှင့် နိုင်ငံရေး ဆွေးနွေးရန် သဘောထားရှိကြောင်း ထုတ်ပြန်ခဲ့သည်။
ဗိုလ်ချုပ်ကြီးယွက်စစ်ပင် ဥက္ကဋ္ဌအဖြစ် ဆက်လက်တာဝန်ယူခဲ့သည့် RCSS၏ တတိယအကြိမ် ကွန်ကရက်၏ ထုတ်ပြန်ချက်တွင် “တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်၏ နိုင်ငံရေးဆွေးနွေးခြင်း ဖိတ်ခေါ်ချက်သည် လက်ရှိ အထွေထွေ နိုင်ငံရေး အကျပ်အတည်း ဖြေရှင်းနိုင်ရေးနှင့် ဖက်ဒရယ်ပြည်ထောင်စု တည်ဆောက်နိုင်ရေးအတွက် ရည်မှန်းပါက ကြိုဆိုသည်”ဟု ဖော်ပြခဲ့သည်။
Public Service Announcement
သို့ရာတွင် အာဏာသိမ်းစက RCSS ဥက္ကဋ္ဌ ဗိုလ်ချုပ်ကြီးယွက်စစ် အပါအဝင် NCA လက်မှတ်ထိုး တိုင်းရင်းသား လက်နက်ကိုင်တပ် ခေါင်းဆောင်များဖြင့် စုဖွဲ့ထားသည့် ငြိမ်းချမ်းရေးလုပ်ငန်းစဉ် ဦးဆောင်အဖွဲ့(PPST) ၏ ဖေဖော်ဝါရီ ၂၀ရက် ကြေညာချက်တွင် အာဏာသိမ်း စစ်ကောင်စီနှင့် နိုင်ငံရေးဆွေးနွေးမှု ရပ်ဆိုင်းထားမည်ဟု ဖော်ပြခဲ့ပြီး တစ်နှစ်ခံ အကြာတွင် ဗိုလ်ချုပ်ကြီးယွက်စစ် ဦးဆောင်သည့် RCSS၏ လေသံပြောင်းသွားပြီဖြစ်သည်။
မတ်လ ၁၁ရက် PPST အစည်းအဝေးတွင်လည်း ဗိုလ်ချုပ်ကြီးယွက်စစ်က ပြည်သူများနှင့်အတူ ရပ်တည်ပြီး စစ်အာဏာရှင် စနစ်ချုပ်ငြိမ်းရေး ဆောင်ရွက်သွားမည်ဖြစ်ပြီး စစ်ကောင်စီနှင့် နိုင်ငံရေးအရ တွေ့ဆုံ ဆွေးနွေးခြင်းများ ရပ်ဆိုင်းထားခြင်း ဆုံးဖြတ်ချက်ကို အခိုင်အမာ ဆက်လက်ကိုင်စွဲသွားမည်ဟု ပြောဆိုခဲ့သည်။ ထို့ပြင် စစ်ကောင်စီသည် NCA စာချုပ်ကိုပြောင်ပြောင်တင်းတင်း အတိအလင်း ချိုးဖောက်ပြီး NCAကို မျက်ကွယ်ပြု ထင်ရာဆိုင်းနေကြောင်း ဗိုလ်ချုပ်ကြီးယွက်စစ်က ပြောဆိုခဲ့သည်။
သို့ရာတွင် RCSS အနေဖြင့် စစ်ကောင်စီကို ခုခံတိုက်ခိုက်သည့် တိုက်ပွဲတစ်ကြိမ်မျှမရှိခဲ့ပေ။ တစ်ဖက်တွင် အခြားရှမ်းလက်နက်ကိုင်အဖွဲ့ဖြစ်သော SSPPနှင့်သာ မကြာခဏတိုက်ပွဲဖြစ်နေသည်။ စစ်ကောင်စီကို မတိုက်ခဲ့ဘူးသော်လည်းယခုအခါ စစ်ကောင်စီ၏ နိုင်ငံရေးဆွေနွေးခြင်း ဖိတ်ခေါ်ချက်ကို ကြိုဆိုသည်ဟု ထုတ်ပြန်ခဲ့ပြန်သည်။
တိုင်းရင်းသားလက်နက်ကိုင်တော်လှန်ရေး အဖွဲ့များအနက် စစ်တပ်အာဏာသိမ်းပြီးနောက်ပိုင်း စစ်ကောင်စီတပ် ကို အဓိက ခုခံတိုက်ခိုက်နေသည့် အဖွဲ့များမှာ ကရင်(KNU)၊ ကချင်(KIO/KIA)၊ ကရင်နီ(KNPP)၊ ချင်း(CNF)၊ ကိုးကန့်(MNDAA) တို့ ဖြစ်သည်။
