စစ်ကိုင်းတိုင်း၊ စစ်ကိုင်းမြို့နှင့် မုံရွာမြို့များတွင် ယနေ့ စစ်ကောင်စီတပ် ရှိသောနေရာများအနီး ဗုံးပေါက်ကွဲမှုများဖြစ်ပွားခဲ့ကြောင်း ဒေသခံများက ပြောသည်။
ယနေ့ (ဇန်နဝါရီ ၁၉ရက်)နေ့လယ် ၁၂ နာရီခန့်က စစ်ကိုင်းမြို့တွင်း ချင်းစုမီးပွိုင့်ထောင့်တွင်စစ်ဆေးနေသော အကြမ်းဖက်စစ်ကောင်စီတပ်အား ဗုံးဖြင့်ပစ်ခတ်ခံရကြောင်း၊ ညနေ ၆ နာရီ ဝန်းကျင်က စစ်ကိုင်း စည်ပင်ရုံးအနီး၌ ဗုံးပေါက်ကွဲမှုတစ်ခုဖြစ်ပွားခဲ့ကြောင်း စစ်ကိုင်းဒေသခံများက ပြောသည်။
“ဗုံးနဲ့အပစ်ခံရတဲ့ ချင်းစုမီးပွိုင့်မှာဆို ပြည်သူတွေကိုဒူးထောက်ခိုင်းထားပြီးစစ်တာ။”ဟု စစ်ကိုင်းမြို့ခံတစ်ဦးက ပြောသည်။
အလားတူ မုံရွာမြို့တွင်လည်း ယနေ့ နံနက် ၁၁ နာရီခန့်က စစ်ကောင်စီတပ်ဖွဲ့ဝင်များရှိသောဘိုးဘွားရိပ်သာလမ်းတွင် ၂ လုံး၊ စက်မှုစခန်းတွင် ၁ လုံး၊ စက်မှုခန်းမတွင် ၂ လုံး၊ မြို့ပတ်လမ်း ၁ လုံး တို့အသီးသီးဖောက်ခွဲတိုက်ခိုက်ခဲ့ကြောင်း၊ ထို့အပြင် ညနေ ၅ နာရီနောက်ပိုင်းတွင်လည်း မိုးကောင်းလမ်းတွင် ၃ လုံး၊ ဘိုးဘွားရိပ်သာ အဝိုင်းပတ် ၁ လုံး၊ ဇရပ်ဝိုင်း KFCဆိုင်အနီး ၁ လုံး၊ နာရီစင်အနီး ၁ လုံး၊ ချင်းတွင်းမြင့်ဟိုတယ်အနီး ၁ လုံး၊ ဆည်မြောင်းရုံးအနီး ၁ လုံး၊ စီးပွားရေးဘဏ်အနီး ၁ လုံး၊ ဖောက်ခွဲတိုက်ခိုက်ခဲ့ကြောင်း မုံရွာမြို့ပြပျောက်ကြားအဖွဲ့များက အသိပေးသည်။
Public Service Announcement
စစ်ကောင်စီတပ်ဖွဲ့ဝင် ထိခိုက်သေဆုံးမှုအခြေအနေကို ရဲဘော်များလုံခြုံရေးအခြေအနေအရ စောင့်ကြည့်နိုင်ခြင်းမရှိကြောင်း၊ မိဘပြည်သူများအနေဖြင့် အကြမ်းဖက်စစ်ကောင်စီတပ်နှင့်၎င်းတို့၏ထောက်တိုင်များနှင့်ဝေးရာနေရာများတွင် နေထိုင်ကြရန် မြို့ပြပျောက်ကြားအဖွဲ့များက ပြောသည်။
မုံရွာပေါက်ကွဲမှုဖြစ်စဥ်များအား Monywa NightKing၊ AFC Monywaနှင့် Monywa Ninja အဖွဲ့တို့က ပြုလုပ်ခဲ့ခြင်းဖြစ်ကြောင်းပြည်သူကိုအသိ့ပေးထားသည်။
