ကလေး-သိုင်းငင်းလမ်းပိုင်းမှ ရွာတစ်ရွာတွင်တပ်စွဲထားသောအကြမ်းဖမ်းစစ်ကောင်စီတပ်ကို ပြည်သူ့ကာကွယ်ရေးမဟာမိတ်အဖွဲ့များက စီးနင်းတိုက်ခိုက်ခဲ့ရာ စစ်ကောင်စီဘက်က ၁၅ဦးထက်မနည်းသေဆုံးပြီး အများအပြားဒဏ်ရာရသွားသည်ဟု Zomi PDFက ယနေ့သတင်းထုတ်ပြန်သည်။
ကလေးမြို့နှင့် ချင်းပြည်နယ်ဆက်သွယ်ထားသော ကလေး-သိုင်းငင်းလမ်းအတိုင်းတက်လာပြီး ဟိန်ဇိန်ရွာတွင်တပ်စွဲနေသောစစ်ကောင်စီတပ်ကို ယနေ့(ဇန်နဝါရီ ၂၁)နံနက် တစ်နာရီ၄၅မိနစ်တွင် ဝင်ရောက်စီးနင်းတိုက်ခိုက်ခြင်းဟု Zomi PDFက သတင်းထုတ်ပြန်ထားသည်။ စစ်ကောင်စီဘက်က ၁၅ဦးထက်မနည်းသေဆုံးပြီး အများအပြားဒဏ်ရာရသွားကာ ဒေသခံပြည်သူ့ကာကွယ်ရေးတပ်ဘက်မှ နှစ်ဦး ဒဏ်ရာအနည်းငယ်ရခဲ့သည်ဟု ထုတ်ပြန်ချက်တွင်ပါရှိသည်။
ယင်းတိုက်ပွဲကို Zomi PDF (NUG-PDF ကလေးခရိုင် တပ်ရင်း ၈) အဖွဲ့နှင့် ကလေး-ချင်းပြည်နယ်ဒေသရှိ ညီနောင်မဟာမိတ်ကာကွယ်ရေးတပ်ဖွဲ့များဖြစ်သော CDM Siyin, PDF Zoland, CNA, Kalay PDF တပ်ရင်း (၃)နှင့်(၉), PDA, Zongam Army, CDF-KKG တို့ ပူးပေါင်းတိုက်ခိုက်ခဲ့ခြင်းဖြစ်သည်။
မိဘပြည်သူများအနေဖြင့် ကာကွယ်ရေးတပ်ဖွဲ့များ၏ အသိပေးကြေညာချက်များ ၊ သတိပေးပန်ကြားချက်များကို အထူးလေးစားလိုက်နာပေးပါရန်နှင့် ကိုယ်အားဖြင့်သော်လည်းကောင်း စိတ်အားဖြင့်သော်လည်းကောင်း သတိရကူညီဆုတောင်းပေးကြပါရန်လည်း Zomi PDFက မေတ္တာရပ်ခံထားသည်။