အလှူရှင်များထံမှ ရရှိလာသောအလှူငွေများကို CDM ရဲဘော် ၁၇ ဦးအား တစ်ဦးလျှင်ကျပ် ၁၀၈,၀၀၀ စီထောက်ပံ့ငွေ ပေးအပ်ကြောင်း ပြည်သူ့ကာကွယ်ရေးတပ်-ဒီးမော့ဆို (DMO- PDF)က ယနေ့(ဇန်နဝါရီ ၂၃ ရက်)တွင် ထုတ်ပြန်သည်။
CDM ဝန်ထမ်းများသည် မိမိကိုယ်ကျိုးအတွက် စွန့်လွတ်ကာ ပြည်သူလူထုနှင့် ရပ်တည်သည့်အပြင် PDFတပ်ဖွဲ့သို့ အမြောက်အများဝင်ရောက်ပြီး စစ်အာဏာရှင်ကျဆုံးထိတိုင်အောင် လက်နက်စွဲကိုင်တော်လှန်ပါဝင်ခဲ့ကြသည်ဟု ဖော်ပြထားသည်။
စစ်တပ်က အာဏာသိမ်းယူပြီးနောက်ပိုင်းတွင် ဌာနဆိုင်ရာဝန်ထမ်း အများစုသည် ပြည်သူလူထုဖက်သို့ ရပ်တည်ပြီး CDM ပြုလုပ်လာခဲ့သည်။
ထို့ကြောင့် ပြည်သူ့ကာကွယ်ရေးတပ်-ဒီးမော့ဆို (DMO-PDF)တပ်ဖွဲ့သည် အလှူရှင်များနှင့် ချိတ်ဆက်ပြီးရရှိလာသော အလှူငွေများကို CDM ရဲဘော်ထံ ဆက်လက်ထောက်ပံ့နိုင်ရန် ကြိုးစားဆောင်ရွက်နေကြောင်း အသိပေးသည်။
Public Service Announcement
ထို့အပြင် ပြည်သူ့ကာကွယ်ရေးတပ်-ဒီးမော့ဆို (DMO-PDF) ဗဟိုကော်မတီမှ ဦးဆောင်ပြီးအလှည့်ကျထောက်ပံ့ငွေများကို ၂၀၂၂ ဇန်နဝါရီ၅ရက်တွင် CDM ရဲဘော် ၂၉ဦးထံသို့ တစ်ဦးလျှင် ကျပ် ၁၀၈၀၀၀ ပထမအကြိမ် ပေးအပ်ခဲ့သည်ဟုလည်း ထုတ်ပြန်ချက်၌ ပါရှိသည်။
ပြည်တွင်း၊ပြည်ပရှိ အလှူရှင်များ၏ ထောက်ပံ့ကူညီမှုကြောင့် CDM ရဲဘော် မိသားစုဝင်များ၏ စားဝတ်နေရေးအတွက် များစွာအထောက်အကူဖြစ်စေခဲ့ပြီး ဆက်လက်ကူညီ ထောက်ပံနိုင်ရန်လည်း အလှူရှင်များကို မေတ္တာရပ်ခံသည်။
