ရတနာကမ်းလွန် သဘာဝဓာတ်ငွေ့စီမံကိန်းသည် ထိုင်းနှင့် မြန်မာပြည်သူများအတွက် စွမ်းအင်လုံခြုံရေးအရေးပါပြီး နှစ်နိုင်ငံပြည်သူများ၏ စွမ်းအင်လိုအပ်ချက်ကြောင့် လူနေမှုဘဝများကိုလည်း ထိခိုက်မည်ကို ကာကွယ်ရမည်ဟု ထိုင်းကုမ္ပဏီကဆိုသည်။ ထိုထုတ်ပြန်ချက်ကြောင့် စီမံကိန်းကို PTTဆက်လုပ်မည်ဟုဆိုလိုသကဲ့သို့အဓိပ္ပါယ်ယူရမည်ဖြစ်သည်။
ပြင်သစ်ရေနံကုမ္ပဏီ Total ၏ ရတနာကမ်းလွန်စီမံကိန်းနှင့် မုတ္တမဓာတ်ငွေ့ပို့ဆောင်ရေးကုမ္ပဏီတို့မှ နှုတ်ထွက်ကြောင်း အကြောင်းကြားစာကို ဇန်နဝါရီ ၂၁ ရက်ကလက်ခံ ရရှိခဲ့သည်ဟု PTTEPကဆိုသည်။ သို့သော်လည်း ပြင်သစ်ကုမ္ပဏီသည် ဓာတ်ငွေ့ထုတ်လုပ်မူကို ၆ လ ဆက်လက်လုပ်ကိုင်နေဦးမည်ဟုဖော်ပြထားသည်။
Total Energies သည် မြန်မာနိုင်ငံမှ နှုတ်ထွက်မည်ဖြစ်သော်လည်း မြန်မာပြည်သူများတောင်းဆိုနေသည့် စစ်ကောင်စီထံ ငွေပေးချေမူများကို ရပ်တန့်နိုင်မည်မဟုတ်ဟုပြင်သစ်ကုမ္ပဏီကဆိုသည်။ အဘယ်ကြောင့်ဆိုသော်လည်း ဓာတ်ငွေ့ရောင်းချမှုအတွက် ငွေပေးချေမှုအများစုကို ထိုင်းကုမ္ပဏီ PTTEP က MOGEကို တိုက်ရိုက်ပေးချေနေသောကြောင့် TotalEnergies က တားဆီးရန်မဖြစ်နိုင်ဟုဆိုသည်။
Total အပြင် အမေရိကန် စွမ်းအင်ကုမ္ပဏီ ရှက်ဗရွန်ကလည်း မြန်မာနိုင်ငံက ပြန်ထွက်ရန် စနစ်တကျ ပြင်ဆင်နေကြောင်း ရိုက်တာသတင်းဌာနသို့ဖြေကြားထားသည်။
ရတနာကမ်းလွန်သဘာဝဓာတ်ငွေ့စီမံကိန်းနှင့် မုတ္တမ ဓာတ်ငွေ့ ပို့ဆောင်ရေးကုမ္ပဏီ( MGTC)တို့တွင် ပြင်သစ်ကုမ္ပဏီ Total Energies က အော်ပရေတာအဖြစ် ရှယ်ယာ ၃၁ ရာခိုင်နှုန်းကျော်၊ အမေရိကန် ချက်ဗရွန်ကုမ္ပဏီက ရှယ်ယာ ၂၈ ရာခိုင်နှုန်းကျော်၊ ထိုင်း PTTEPက ရှယ်ယာ ၂၅ ရာခိုင်နှုန်းကျော်နှင့် မြန်မာ့နိူင်ငံမှ လက်ရှိတွင် အာဏာသိမ်းစစ်ကောင်စီပိုင် MOGEက ရှယ်ယာ ၁၅ ရာခိုင်နှုန်းပိုင်ဆိုင်ထားခြင်းဖြစ်သည်။