နိုင်ငံတကာမှ လာရောက် ရင်းနှီးမြှုပ်နှံသည့် စီမံကိန်းများအား နှောက်ယှက်ဖျက်ဆီးသူများကို ထိရောက်စွာအရေးယူဆောင်ရွက်သွားမည်ဟု တရုတ်နယ်စပ် အခြေစိုက် တအာင်းတပ်မတော်(TNLA)၊ ကိုးကန့်တပ်မတော်(MNDAA)နှင့် တရုတ်စီမံကိန်းများ ရှိရာ ရခိုင်ဒေသ အခြေစိုက် ရက္ခိုင့်တပ်တော်(AA) တို့က ယမတ်နေ့တွင်ထုတ်ပြန်သည်။
မြောက်ပိုင်းမဟာမိတ်ညီနောင်သုံးဖွဲ့၏ထိန်းချုပ်နယ်မြေအတွင်းနှင့် လှုပ်ရှားနယ်မြေများအတွင်းတည်ငြိမ်အေးချမ်းရေးအတွက်ဆိုကာ ပူးတွဲထုတ်ပြန်ကြေညာချက်ကို ဇူလိုင် ၁ ရက် ရက်စွဲဖြင့်ထုတ်ပြန်ခဲ့ခြင်းဖြစ်သည်။မဟာမိတ်သုံးဖွဲ့ ထိန်းချုပ်နယ်မြေများနှင့် လှုပ်ရှားနယ်မြေများအတွင်း အကြမ်းဖက်တိုက်ဖျက်ရေးနှင့် ရာဇဝတ်မှုကျူး လွန်သည့်လုပ်ရပ်များအား ချေမှုန်းရေးလုပ်ငန်းများကိုပိုမိုတိုးတက်ကောင်းမွန်ရန် အတွက်၊တက်ကြွစွာ အတူပူးပေါင်းဆောင်ရွက်နိုင်ရန် ယခုကဲ့သို့သဘောထားထုတ်ပြန်ခြင်းဖြစ်သည်ဟုဆိုသည်။
နိုင်ငံတကာ ရင်းနှီးမြှုပ်နှံမှု ကုမ္ပဏီ (သို့မဟုတ်) လူပုဂ္ဂိုလ် များအပေါ် အနှောက်အယှက်ပေးခြင်း၊ ဆက်ကြေးတောင်းခြင်း စသည့် ပြစ်မှုများ ကျူးလွန်သူ မည်သူ့ကို မဆို ဥပဒေအရ အရေးယူဆောင်ရွက်သွားမည်ဟုလည်းဆိုသည်။
ဒေသတည်ငြိမ်းအေးချမ်းရေး၊ လုံခြုံရေးနှင့် သူတစ်ပါး၏ အသက်အိုးအိမ်စည်းစိမ်များကို ထိခိုက်စေနိုင်သော အကြမ်းဖက်လုပ်ရပ်များနှင့် ကျူးလွန်သူများကို မည်သည့်အခါတွင်မျှ အားမပေးဘဲ တားဆီးကာ တိုက်ဖျက်ချေမှုန်းသွားမည်ဟုလည်း ဖော်ပြသည်။
Public Service Announcement
ရာဇဝတ်မှု ကျူးလွန်သည့် လုပ်ရပ်များနှင့် ပတ်သက်သော ပစ္စည်းဥစ္စာများကို ဥပဒေနှင့်အညီ ထိန်းသိမ်းပြီးစစ်ဆေးကာ နည်းမှန် လမ်းမှန် အရေးယူသွားမည်ဟု ဆိုသည်။
အကြမ်းဖက် လုပ်ရပ် အား ကျူးလွန်သူများ၊ ရာဇဝတ်မှုကျူးလွန်သူများအား အကာအကွယ်ပေးနေသူများကို ဖြိုခွင်းတိုက်ဖျက် အရေးယူသွားမည်ဖြစ်ကြောင်း ၊ လူကုန်ကူးခြင်းနှင့် အတင်းအဓမ္မ လုပ်အားခိုင်းစေသူများကို ထိထိရောက်ရောက် အရေးယူဆောင်ရွက်သွားမည်ဖြစ်ကြောင်း မြောက်ပိုင်းသုံးဖွဲ့က ထုတ်ပြန်သည်။
အကြမ်းဖက်လုပ်ရပ်များအား ကျူးလွန်သောသူများကို တွေ့ရှိပါက အချိန်မီ သတင်းပို့ရန်လည်း မေတ္တာရပ်ခံထားသည်။
မြန်မာလူထု တစ်ရပ်လုံးနှင့် တော်လှန်ရေးအဖွဲ့အစည်းများအပေါ် အားပေးထောက်ခံကြသူများ အနေဖြင့် ကမ္ဘာ့ငြိမ်းချမ်းရေး၊ အကြမ်းဖက်တိုက်ဖျက်ရေးနှင့် ရာဇဝတ်မှု ကျူးလွန်သည့် လုပ်ရပ်များအား ချေမှုန်းရေးလုပ်ငန်းများတွင် အတူတကွ တက်ကြွစွာ ပူးပေါင်း ဆောင်ရွက်ရန်လည်း တိုက်တွန်းထားသည်။
မြောက်ပိုင်းမဟာမိတ် ၃ ဖွဲ့က နိုင်ငံတကာ စီမံကိန်းများဟုသော်လည်း တရုတ် စီမံကိန်းများကို ရည်ညွှန်းခြင်းဖြစ်ကြောင်း ရှမ်းပြည်နယ်မြောက်ပိုင်းနေပြည်သူတစ်ဦးကပြောသည်။
ယခုကဲ့သို့ကြေညာချက်ထုတ်ပြန်ရခြင်းနှင့်ပတ်သက်ပြီး မေးမြန်းရန် TNLA သတင်းပြန်ကြားရေးဌာနမှူး ဒုဗိုလ်မှူးကြီးတားအိုက်ကျော်အား ဆက်သွယ်ရာအဆက်အသွယ်မရသေးပေ။
