မကွေးတိုင်း၊ ငဖဲမြို့၊ မင်းဘူး-အမ်းလမ်းဘေး ရေနံ နှင့် သဘာဝဓာတ်ငွေ့ပိုက်လိုင်းလုံခြုံရေးချထားသည့် စစ်ကောင်စီတပ်စခန်းငယ်တစ်ခုကို ဝင်ရောက်စီးနင်းတိုက်ခိုက်ခဲ့ကြောင်း ဒေသအခြေစိုက် CDF-Asho တပ်ဖွဲ့မှ တာဝန်ရှိသူတစ်ဦးက ပြောသည်။
ယမန်နေ့(သြဂုတ် ၂၀)နံနက် ၅ နာရီခွဲက မင်းဘူး-အမ်းလမ်းမကြီး မြေလတ်ရွာအနီးရှိ စစ်ကောင်စီတပ်စခန်းတစ်ခုကို စခန်းထဲအထိ ဝင်ရောက်တိုက်ခိုက်ခဲ့ခြင်းဖြစ်ပြီး စစ်ကောင်စီတပ်မှ အရာခံဗိုလ်တစ်ဦးနေရာတင်သေဆုံးကာ ဒဏ်ရာရသွားသောအခြားဆင့်တစ်ဦးမှာ ဆေးရုံရောက်ချိန်တွင်မှ ထပ်မံသေဆုံးသွားခြင်းဖြစ်ကြောင်း CDF-Asho တပ်ဖွဲ့မှ တာဝန်ရှိသူက ပြောသည်။
“ကျနော်တို့ စခန်းအိပ်ဆောင်ထဲအထိ ဝင်ပစ်ခဲ့တာဗျ။ အရာခံဗိုလ်က နေရာမှာတင်သေတယ်။ နောက်တစ်ဦးက ဆေးရုံရောက်မှ သေတယ်လို့ ထပ်သိရတယ်”ဟု ၎င်းက ဆိုသည်။
တိုက်ခိုက်ချိန်တွင် စစ်ကောင်စီတပ်စခန်း၌ အင်အား (၁၀)ဦးကျော်ရှိနေပြီး ၄၅ မိနစ်ခန့်အပြန်အလှန်ပစ်ခတ်မှုဖြစ်ကာ လက်နက်ရရှိရေးကြိုးပမ်းခဲ့သော်လည်း စစ်တပ်ဘက်မှ တပ်ကူများရောက်လာနိုင်ခြင်း၊ ခဲယမ်းမလုံလောက်ခြင်း၊ အင်အားမမျှတခြင်းတို့ကြောင့် ပြန်လာဆုတ်ခွာခဲ့ရကြောင်းအသိပေးသည်။
Public Service Announcement
ထို့နောက် တိုက်ခိုက်မှုဖြစ်ပွားပြီး ၁ နာရီခန့်အကြာတွင် စစ်ကောင်စီဘက်မှ ငဖဲမြို့အခြေ စိုက် အမြှောက်တပ် အမတ-၃၇၅ မှ စစ်ကားနှစ်စီး၊ လူနာတင်ကားနှစ်စီးရောက်ရှိလာပြီး သေဆုံးနှင့် ဒဏ်ရာရစစ်ကောင်စီတပ်သားများအား လာရောက်သယ်ဆောင်သွားကြောင်း CDF-Asho တပ်ဖွဲ့ထံမှ သိရသည်။
ယင်းအပြင် စခန်းတိုက်ခိုက်ခံရပြီးနောက် စစ်ကောင်စီတပ်က အဆိုပါစခန်းအနီးဝင်ကျင်သို့ တပ်ကူစေလွှတ်၍ လုံခြုံရေးတိုးမြှင့်ခဲ့သလို CDF-Asho တပ်ဖွဲ့မှလည်း ၎င်းတို့၏ တပ်ဖွဲ့ဝင်များအား ကင်းပုန်းချထားခဲ့ကြောင်း စုံးမ်းသိရသည်။
