ဘုံဆုံးဖြတ်ချက် ၅ရပ် တိုးတက်မှုမရှိပါက အာဆီယံအစည်းအဝေးများကို မင်းအောင်လှိုင်တက်ရောက်ခွင့်ရမည်မဟုတ်
အင်ဒိုနီးရှားသမ္မတဂျိုကိုဝီဒိုဒိုသည် မြန်မာစစ်ကောင်စီအနေဖြင့် အာဆီယံဘုံဆုံးဖြတ်ချက် ၅ရပ်ကို အကောင်အထည်ဖော်ရေး ပျက်ကွက်မှုအပေါ် စိတ်ပျက်မိကြောင်း ကမ္ဘောဒီးယားဝန်ကြီးချုပ်ဟွန်ဆန်နှင့်ဆက်သွယ်စဉ် ထည့်သွင်းပြောကြားသည်။
ယခုလအတွင်း မြန်မာ့အရေးကို ကမ္ဘောဒီးယားဝန်ကြီးချုပ်နှင့် ဒုတိယအကြိမ်ဆက်သွယ်ပြောကြားခြင်းဖြစ်ပြီး ဝန်ကြီးချုပ်ဟွန်ဆန်၏ နေပြည်တော်ခရီးစဉ်အပြီးတွင် စစ်ကောင်စီကို စိတ်ပျက်ကြောင်း ထပ်မံပြောကြားခြင်းဖြစ်သည်။
မြန်မာ့အရေးနှင့်ပတ်သက်၍ အာဆီယံ၏ ချဉ်းကပ်မှုသည် ရရှိထားပြီးသော သဘောတူညီချက်များ အထူးသဖြင့် ဘုံဆုံးဖြတ်ချက် ၅ရပ်အပေါ် အခြေခံသင့်ကြောင်းနှင့် မြန်မာစစ်တပ်အာဏာပိုင်များအဆိုပြုသည့် ၎င်းတို့၏ ရှေ့လုပ်ငန်းစဉ် ၅ရပ်နှင့် ချိတ်ဆက်ခြင်းမပြုရန် အင်ဒိုနီးရှားသမ္မတဂျိုကိုဝီဒိုဒိုက အလေးပေးပြောသည်။
Public Service Announcement
ထို့အပြင် အာဆီယံ၏ဘုံဆုံးဖြတ်ချက် ၅ရပ် တိုးတက်မှုမရှိပါက အာဆီယံအစည်းအဝေးများ တွင် မြန်မာအနေဖြင့် နိုင်ငံရေးကိုယ်စားပြုသူမဟုတ်သူ(non-political)ကိုသာ တက်ရောက်ခွင့် ရရှိမည်ဖြစ်ကြောင်း အင်ဒိုနီးရှားသမ္မတက ထပ်လောင်းပြောကြားသည်။
မြန်မာစစ်တပ်သည် အားလုံးပါဝင်သော တွေ့ဆုံဆွေးနွေးရေးအတွက် အာဆီယံအထူးကိုယ်စားလှယ်ကို ဘက်အားလုံးနှင့်ဆက်သွယ်ရန်ခွင့်ပြုပေးရန် ဂျိုကိုဝီဒိုဒိုက တိုက်တွန်းသည်။
Reference – Bernama. com
