စစ်ကိုင်းတိုင်း၊ ကနီမြို့နယ်တွင် တိုက်ပွဲဖြစ်ပွါးနေချိန် အခွင့်ကောင်းယူကာ အမျိုးသားဥယျာဥ်အတွင်းမှ သစ်ခိုးတင်လာသော ကားနှစ်စီးအား ကနီပြည်သူ့ကာကွယ်ရေးအဖွဲ့က ဖမ်းဆီးထိန်းသိမ်းခဲ့သည်။
ဇန်နဝါရီလ ၂၂ ရက်နေ့က စစ်ကိုင်းတိုင်း၊ မုံရွာမြို့နယ်၊ အလုံမင်းထောင့်ဆိပ်ကမ်းမှ ချင်းတွင်း မြစ်ကြောင်းအတိုင်း အထက်သို့ဆန်တက်လာသည့် စစ်ကောင်စီ၏ ရေယာဥ်အုပ်စုနှင့် ဒေသခံ PDF များ နှစ်ဖက်အပြန်အလှန် ပစ်ခတ်တိုက်ပွဲ ဖြစ်ပွားခဲ့သည်။ထို့နောက် စစ်ကောင်စီ၏ တပ်များက ညနေ (၃) နာရီ အချိန်ခန့်တွင် မုဌောကျေးရွာထဲသို့ ဝင်ရောက်၍ ပြည်သူများ၏ နေအိမ်များကို မွှေနှောက်ပြီး ရည်ရွယ်ချက်ရှိရှိ မီးရှို့ဖျက်ဆီးခဲ့သည်။
ထိုအခြေနေများကို အခွင့်ကောင်းယူကာ ဝိသမလောဘသားတို့က အမျိုးသားဥယာဥ်မှ တရားမဝင်သယ်ဆောင်လာသော ပိတောက်သစ်သား ခန့်မှန်းချေ တန်ချိန်(၅)တန်ခန့်စီ တင်ဆောင်လာသော ကားနှစ်စီးအား ကနီပြည်သူ့ကာကွယ်ရေးအဖွဲ့ (Kani PDF-Klg)က ပြည်သူ့အကျိုးစီးပွားကို ရှေးရှု၍ အချိန်မှီ ထိန်းသိမ်းထားနိုင်ခဲ့ကြောင်းသတင်းထုတ်ပြန်သည်။
“ကားနဲ့သစ်များ သိမ်းထားပါတယ်။သစ်များကို ကာလပေါက်ဈေးနဲ့ရောင်းပြီး ရောင်းရငွေကို တော်လှန်ရေးအတွက် အသုံးပြုသွားပါမယ်။ ကားကို ရဲဘော်တွေ တိုက်ပွဲထွက်ရာမှာသွားလာဖို့ အသုံးပြုပါမယ်။”ဟု ကနီPDFအဖွဲ့ တာဝန်ရှိသူက လူထုနွေဦးသို့ ဖြေကြားသည်။
Public Service Announcement
ကနီမြို့နယ်၊ ချင်းတွင်းမြစ်ဘေးကျေးရွာများတွင် အကြမ်းဖက်စစ်ကောင်စီတပ်နှင့် ဒေသတွင်းပြည်သူ့ကာကွယ်ရေးအဖွဲ့များ တိုက်ပွဲများဖြစ်ပွားနေပြီး ဇန်နဝါရီလ ၂၃ ရက်နေ့က မုံရွာမှဆန်တက်လာသော အကြမ်းဖက်စစ်ကောင်စီ၏ ထောက်ပို့ရေယာဉ်များကို မုဋ္ဌောရွာနှင့် ညောင်ပင်ဝန်းရွာကြားတွင် စကစတပ်များနှင့် ဒေသတွင်းပြည်သူ့ကာကွယ်ရေးတပ်ဖွဲ့များဖြစ်သော KLG PDF, MPDF, Golden Triangle Forces, M&K The Boys, အစရှိသော ညီနောင်မဟာမိတ်အဖွဲ့များနှင့် ထိတွေ့တိုက်ပွဲ ဖြစ်ခဲ့သည်။ စစ်ကောင်စီဘက်မှ ၃ပွင့်အရာရှိတစ်ဦးနှင့် စစ်ကောင်စီတပ်သား ၅ဦး သေဆုံးခဲ့ကြောင်း မဟာမိတ်အဖွဲ့များက အသိပေးသည်။
