မန္တလေးတိုင်း နွားထိုးကြီးမြို့နယ်တွင် အကြမ်းဖက်စစ်ကောင်စီတပ်စွဲထားသော ယုန်တိုးတောင်အနီးနှင့် တရုတ်ဓာတ်ငွေ့ပိုက်လိုင်းကင်းစခန်းများအားပစ်ခတ်တိုက်ခိုက်ခဲ့ကြောင်း နွားထိုးကြီး ပြည်သူ့ကာကွယ်ရေးတပ်ဖွဲ့က ပြောသည်။
ယမန်နေ့ (ဖေဖော်ဝါရီ ၁၃ ရက်)ညနေ ၃း၃၀ ခန့်က နွားထိုးကြီးနှင့် မြင်းခြံနယ်စပ်ရှိ ယုန်တိုးတောင်အနီးတွင် ဆိုင်ကယ်များဖြင့် ကင်းလှည့်လာသော အကြမ်းဖက်စစ်ကောင်စီတပ်ဖွဲ့ကို နွားထိုးကြီးပြည်သူ့ကာကွယ်ရေးတပ်ဖွဲ့က ပစ်ခတ်တိုက်ခိုက်ရာ စစ်သား ၂ ဦးသေဆုံးခဲ့သည်။ထိုတိုက်ခိုက်မှုတွင် ဆိုင်ကယ် ၄ စီး၊ ငှက်ကြီးတောင် ဓါး ၁ ချောင်း သိမ်းဆည်းရမိပြီး ဆိုင်ကယ်များအား မီးရှို့ဖျက်ဆီးခဲ့ကြောင်း နွားထိုးကြီး PDFက အသိပေးသည်။
“ယုန်ထိုးတောင်ပေါ် ကင်းပတ်တာ။ ယုန်ထိုးတောင်နားမှာ တပ်စွဲထားတာရှိတယ်။ တပ်စခန်းကနေကင်းပတ်ဖို့ စထွက်လာတဲ့အချိန် တိုက်ပွဲဖြစ်တာ။”ဟု နွားထိုးကြီးပြည်သူ့ကာကွယ်ရေးတပ်ဖွဲ့တာဝန်ရှိသူက ပြောသည်။စစ်ကောင်စီတပ်မှ လက်နက်ကြီးဖြင့်ပစ်ခတ်၍ အလောင်း
နှင့်သေနတ်များကိုပြန်ကောက်သွားသဖြင့်သေနတ်များမရလိုက်ကြောင်းလည်းသိ့ရသည်။
ထိုအပြင် ယနေ့ (ဖေဖော်ဝါရီ၁၄ ရက်) နံနက် ၂ နာရီခန့်က နွားထိုးကြီးမြို့နယ်အတွင်းရှိ တရုတ် ဓာတ်ငွေ့ပိုက်လိုင်းစောင့်သည့် အကြမ်းဖက်စစ်ကောင်စီစခန်းတစ်ခုအား အဝေးပစ်နှစ်လုံးဖြင့် ပစ်ခတ်ခဲ့ကြောင်း နွားထိုးကြီး နွားထိုးကြီးပြည်သူ့ကာကွယ်ရေးတပ်ဖွဲ့တာဝန်ရှိသူက လူထုနွေဦးသို့ ပြောသည်။
“စကစဘက်က ထိခိုက်မှုတော့ မသိရသေးဘူး။ အုတ်နံရံတစ်ခြမ်းတော့ ပဲ့ထွက်သွားတယ်လို့ပြောတယ်ဗျ”ဟု ၎င်းက ပြောသည်။ တရုတ်ဓါတ်ငွေ့ပိုက်လိုင်းကို တိုက်ခိုက်ခြင်းမဟုတ်ဘဲ ပိုက်လိုင်းစောင့် အကြမ်းဖက်စစ်ကောင်စီတပ်ကိုတိုက်ခိုက်ခြင်းဖြစ်ကြောင်းလည်း သိရသည်။
နွားထိုးကြီးပြည်သူ့ကာကွယ်ရေးအဖွဲ့သည် ဖေဖော်ဝါရီလ လဆန်းပိုင်းကလည်း အကြမ်းဖက်စစ်ကောင်စီတပ်စွဲထားသော နွားထိုးကြီးမြို့နယ်၊လက်ဝဲမြင်းနီကျေးရွာရှိ အကြမ်းဖက်စစ်သားများအား ပစ်ခတ်တိုက်ခိုက်ခဲ့ပြီး ထိခိုက်သေဆုံးမှုများရှိခဲ့ပြီး လာရောက်စစ်ဆေးသည့်အကြမ်းဖက်စစ်ကောင်စီယာဥ်တန်းကိုပါ ထပ်မံမိုင်းဆွဲတိုက်ခိုက်ခဲ့သည်။