စစ်ကိုင်းတိုင်း စစ်ကိုင်းမြို့ ရေမျက်ကြီးအင်းအတွင်း စစ်ကောင်စီတပ်၏ တိုက်လေယာဥ်တစ်စီးပျက်ကျသွားကြောင်း အဆိုပါမြို့နယ် မီးသတ်ဦးစီးဌာနမှ အရာရှိတစ်ဦးက လူထုနွေဦးသို့ အတည်ပြုသည်။
ယနေ့(ဖေဖော်ဝါရီ ၁၆ ရက်)နံနက် ၁၁နာရီခန့်က ဖြစ်ပွားခဲ့ပြီး ကူညီကယ်ဆယ်မှုအပိုင်းများဆက်လက်လုပ်ကိုင်နေရသည့်အတွက် ဖြစ်စဥ်အသေးစိတ်ကို မသိရသေးကြောင်း ၎င်းက ဆိုသည်။
ယနေ့ နံနက် ၁၀း၄၅အချိန်က အကြမ်းဖက်စစ်ကောင်စီ၏ Jet Fighter တစ်စီးပျက်ကျခဲ့ခြင်းဖြစ်ပြီး အင်းအလယ်သို့ပျက်ကျခြင်းဖြစ်ကာ လူသေအလောင်းတစ်လောင်းဆယ်ယူရရှိထားကြောင်း စစ်ကိုင်းမြို့ခံတစ်ဦးက ပြောသည်။
” ဗွှိုင်လာနဲ့ ခြေထောက်အသားစလေးတွေဘဲရှာတွေ့တော့တယ်လို့ သိရပါတယ်၊ ကစထမှူးလို့ ကနဦးသိရပါတယ်”ဟု စစ်ကိုင်းမြို့နယ် သတင်းမှန်ပြန်ကြားရေးက အသိပေးသည်။
“စက်ချို့ယွင်းပြီး ပျက်ကျတယ်လို့ လောလောဆယ်ပြောလို့ရပါတယ်”ဟု အထက်ပါ မီးသတ်ဦးစီးဌာနမှအရာရှိက ပြောသည်။
အခင်းဖြစ်ရာသို့ မီးသတ်၊ ကြက်ခြေနီ၊ လူတင်ယာဥ်များရောက်ရှိနေကြောင်း ဒေသခံများက ပြောသည်။
အကြမ်းဖက်စစ်ကောင်စီသည် ရဟတ်ယာဥ်အပြင် တိုက်လေယာဥ်များဖြင့်ပါ အသုံးပြု၍ စစ်ကိုင်း၊ မကွေးတိုင်း၊ ကရင်၊ ကရင်နီနှင့် ချင်းပြည်နယ်တို့ကို တိုက်ခိုက်အသုံးပြုနေသည်။
တိုက်လေယာဥ်ပျက်ကျသောသတင်းကို စစ်ကောင်စီကလည်းယနေ့မွန်းလွှဲပိုင်းတွင်ထုတ်ပြန်သည်။ပုံမှန်အားဖြင့် တိုက်ပွဲသတင်းများ စစ်ကောင်စီတပ်သေဆုံးထိ့ခိုက်မှူများထုတ်ပြန်လေ့မရှိသော စစ်ကောင်စီက တံတားဦးလေတပ်စခန်းမှ လေ့ကျင့်ပျံသန်းစဥ်စက်ခြို့ယွင်း၍ပျက်ကျခြင်းဖြစ်သည်ဟုဆိုသည်။လေယာဥ်ပေါ်ပါလေသူရဲကိုရှာဖွေနေဆဲဖြစ်သည်ဟုစစ်ကောင်စီထုတ်ပြန်ချက်တွင်ဖော်ပြထားသည်။ဒေသခံပြည်သူများနှင့် ၊ပြည်သူကာကွယ်ရေးတပ်ဖွဲ့များက လူထုကို လေကြောင်းမှဗုံးကျဲရန်၊ တိုက်ခိုက်ရန်ကြိုးစားရင်း ပျက်ကျခြင်းဖြစ်သည်ဟု ပြောဆိုနေကြသည်။