ပြည်တွင်းပုဂ္ဂလိကဘဏ်များက နိုင်ငံခြားငွေ ဒေါ်လာလိုအပ်ချက်ကြီးမားလာ၍ နိုင်ငံခြားငွေလွှဲဒေါ်လာနှင့် သင်္ဘောသားလစာများကို ကျပ်ဖြင့်ပြောင်းထုတ်ရန် အပြိုင်အဆိုင် မက်လုံးပေးကြော်ငြာလာသည်။
စစ်တပ်အာဏာသိမ်းပြီးနောက် ပြည်တွင်းဘဏ်များတွင် ငွေထုတ်ယူခွင့်ကို ကန့်သတ်ခဲ့သော်လည်း ယခုအခါ ပြည်တွင်းဘဏ်များက ဒေါ်လာရရှိမည့် နိုင်ငံခြားငွေလွှဲဝန်ဆောသ်မှုများကို အကန့်အသတ်မရှိထုတ်ယူနိုင်ကြောင်းနှင့် လက်ဆောင်အဖြစ် အပိုဆောင်းငွေများ ပေးအပ်မည်ဟု ဘဏ်များကအပြိုင်အဆိုင်ကြော်ငြာလာကြခြင်းဖြစ်သည်။
စစ်တပ်က နိုင်ငံတော်အာဏာကို လုယူပြီးနောက် ပြည်တွင်းဘဏ်များမှ ငွေထုတ်ယူခွင့်ကိုအကြိမ်ကြိမ်ကန့်သတ်ခဲ့ရာ ၂၀၂၁ မတ်လတွင် လူတစ်ဦးလျှင် တစ်ပတ် ကျပ် ၂သိန်းနှင့် ကုမ္ပဏီတစ်ခုကို ကျပ် သိန်း၂၀ ထုတ်ပေးရန် ကန့်သတ်ခဲ့သည်။
စစ်တပ်အာဏာသိမ်းပြီးနောက် ၂၀၂၁ဖေဖော်ဝါရီ ၃ရက်မှစတင်ပြီး လူမူကွန်ယက်ပေါ်မှ ပျောက်ကွယ်သွားသည့်ဧရာဝတီဘဏ်- AYAဘဏ်သည် ၂၀၂၂ ဖေဖော်ဝါရီ ၁၄ ရက်မှစတင်ပြီး နိုင်ငံခြားငွေလွှဲများ နှင့် ဘင်္ဘောသားလစာနိုင်ငံခြားငွေများကို ကျပ်ငွေဖြင့် ထုတ်ယူနိုင်ပြီဖြစ်ကြောင်း ကြေညာလာသည်။
နိုင်ငံခြားမှပြည်တွင်းသို့ ငွေလွှဲသည့် Western Union ကို မြန်မာကျပ်ငွေဖြင့် ငွေသားအကန့်အသတ်မဲ့ ထုတ်ပေးမည်ဟုဦးဇော်ဇော်၏ AYA ဘဏ်ကကြော်ငြာသည်။ စင်ကာပူ DBS Remitဖြင့် ငွေလွှဲပါက တစ်ပတ်လျှင် ကျပ် ၅သိန်းအထိ အလွယ်တကူထုတ်ယူနိုင်သည်ဟု ဆိုသည်။
ထိုပြင်သင်္ဘောသားလစာနိုင်ငံခြားငွေစာရင်းများကို ကျပ်ငွေဖြင့်ပြောင်းလဲပြီး တစ်ပတ်လျှင် ကျပ် သိန်း ၂၀ ထုတ်ပေးမည်ဟုလည်း ဆိုပြန်သည်။
ဦးချစ်ခိုင်၏မြန်မာ့ရှေ့ဆောင်ဘဏ်-MAB ဘဏ်ကလည်း Western Union ငွေလွှဲစနစ်ဖြင့် နိုင်ငံခြားငွေလွှဲများကို ငွေထုတ်ယူပါက ကျပ်တစ်သောင်း ငွေသားလက်ဆောင်ပေးမည်ဟုကြော်ငြာထားသည်။
စစ်ဗိုလ်ချုပ်ဟောင်းဦးအောင်သောင်းသား ဦးနေအောင်ပိုင်ဆိုင်သည့် UABဘဏ်ကလည်း Western Union ၊ Ria, Krung Thai စသည့် နိုင်ငံခြားငွေလွဲများဖြင့် မြန်မာကျပ်ငွေ ထုတ်ယူပါက မတ် ၁၄ ရက်အထိ ငွေကျပ် ၁၀သိန်းအထက်ထုတ်ယူပါက ငွေသားတစ်သောင်းခွဲ အပိုဆုပေးမည်ဟုကြော်ငြာထားသည်။
မြန်မာနိုင်ငံသားများဘဏ်-MCBက “ 𝗠𝗼𝗻𝗲𝘆𝗚𝗿𝗮𝗺၊ 𝗥𝗶𝗮/ 𝗜𝗠𝗘 ၊𝗖𝗶𝘁𝘆 𝗘𝘅𝗽𝗿𝗲𝘀𝘀 𝗠𝘆𝗮𝗻𝗺𝗮𝗿 ၊ 𝗠𝗲𝗿𝗰𝗵𝗮𝗻𝘁𝗿𝗮𝗱𝗲 နိုင်ငံခြားငွေလွှဲများကို ငွေလွှဲပေးပို့သည့်ပမာဏအတိုင်း ငွေသားအပြည့် 𝗠𝗖𝗕 ဘဏ်ခွဲများတွင် ထုတ်ယူနိုင်ပါပြီ။” ဟု ယမန့်နေက ကြော်ငြာထားသည်။
“ဒေါ်လာလို့အပ်လာလို့ အပြိုင်အဆိုင်မက်လုံးပေးဆွဲဆောင်နေကြတာ။ ဘဏ်တွေမှာ ဒေါ်လာလိုအပ်ချက် တော်တော်များနေတယ်။ ကျပ်ငွေကိုကိုင်ထားရတာ အာမခံချက်မရှိတော့လည်းပါတယ်”ဟု ဘဏ်မန်နေဂျာတစ်ဦးကသုံးသပွပြောသည်။
ရွှေသံလွင်ဦးကျော်ဝင်းပိုင်ဆိုင်သည့် ရွှေဘဏ်ကလည်း နိုင်ငံခြားငွေလွှဲများအတွက် ကျပ်ငါးသိန်းနှင့်အထက်ထုတ်ယူပါက အပိုဆုငွေ ငါးထောင်ပေးမည်ဟုကြော်ငြာထားသည်။