ကေအဲန်ယူ ဒူးပလာယာခရိုင် တပ်မဟာ ၆ နယ်မြေ လေးကေကော်ဒေသအနီးမှာ တကျော့ပြန် စစ်ရေးပဋိပက္ခတွေကြောင့် ဒေသခံတွေ ထပ်မံစစ်ဘေးရှောင်နေရပြီး ထိခိုက်သေဆုံးမှုတွေရှိလာတယ်လို့ ကရင်လူ့အခွင့်အရေးအဖွဲ့ (KHRG) ပြောခွင့်ရသူ စောနန္ဒဆူးက ဆိုပါတယ်။
လေးကေကော်ဒေသအတွင်းက ဖလူးကြီးကျေးရွာဘက်မှာ ဖေဖေါ်ဝါရီ ၁၅ ရက်က ကရင်အမျိုးသားလွတ်မြောက်ရေးတပ်မတော် KNLA ပူးပေါင်းတပ်ဖွဲ့နဲ့ စစ်ကောင်စီ BGF ပူးပေါင်းတပ်တို့အကြား တိုက်ပွဲဖြစ်ပွားခဲ့ပြီး စစ်ကောင်စီဘက်က ထိခိုက်ကျဆုံးမှုများပြားခဲ့လို့ လေယာဉ်နဲ့လာရောက်တိုက်ခိုက်မှုတွေ ထပ်မံလုပ်ဆောင်ခဲ့တာ ဖြစ်ပါတယ်။
လေကြောင်းတိုက်ခိုက်မှုနဲ့ လက်နက်ကြီးပစ်ခတ်မှုကြောင့် ဖလူးကြီးကျေးရွာက ရွာသားတစ်ဦး သေဆုံးသွားခဲ့ပြီး ဘုရားကျောင်းအပါအဝင် နေအိမ်အဆောက်အဦးတွေ ထိခိုက်ပျက်စီးမှုတွေရှိခဲ့တယ်လို့လည်း KHRG ရဲ့ ထုတ်ပြန်ချက်အရ သိရပါတယ်။
“စစ်ပြေးရှောင်ရဲ့အရေအတွက်ကျတော့ အတိအကျတော့ ပြောလို့မရသေးဘူး။ အခုလက်ရှိအချိန်မှာတော့ သူတို့က ကမ်းနံဘေးမှာပေ့ါ မြန်မာဘက်ခြမ်းကမ်းနံဘေးမှာတော့ ရာထောင်ချီတော့ရှိနေသေးတယ်။ ကျေးရွာလေးငါးဆယ်ရွာလောက်တော့ ပြေးနေရတယ်” လို့ KHRG က ပြောခွင့်ရသူ စောနန္ဒဆူးက ဆိုပါတယ်။
Public Service Announcement
တိုက်ပွဲကြောင့် ထပ်မံတိမ်းရှောင်နေခဲ့ရတဲ့ ဒေသခံရွာသားတွေဟာ စားနပ်ရိက္ခာနဲ့ အမိုးအကာအပါအဝင် ရာသီဥတုဒဏ်ကြောင့် စစ်ဘေးရှောင်တချို့ ဖျားနာမှုတွေ ကြုံတွေ့ခဲ့ရပြီး ဆေးဝါးအထောက်အပံ့တွေလည်း လိုအပ်လျက်ရှိနေတယ်လို့ စောနန္ဒဆူးက ပြောပါတယ်။
” သောင်ရင်းမြစ်ကလည်း သိတဲ့အတိုင်းပဲ။ မိုးနည်းနည်းကြီးတာနဲ့က ရေကြီးတာပေါ့နော်။ အဲ့လိုမျိုးဆိုတော့ မိုးမလုံတာတို့ဘာတို့ ကြုံတွေ့ရတယ်။ အဲ့ဒါကြောင့်မို့လို့ အမိုးအကာအလုံအလောက်တော့ လိုအပ်တယ်။ ရာသီဥတုဒဏ်ခံနေရတဲ့ ပြည်သူတွေကကျတော့ တချို့ ဖျားနာမှုတွေကြုံတွေ့ရတာမျိုးတော့ ရှိတာပေါ့နော်” လို့ စောနန္ဒဆူးက ပြောပါတယ်။
နှစ်လာတာကြာမြင့်ပြီးတဲ့ လေးကေကော်ဒေသအတွင်းက ဖြစ်ပွားခဲ့တဲ့ စစ်ရေးပဋိပက္ခအခြေအနေတွေကြောင့် တိမ်းရှောင်နေခဲ့ရတဲ့ ဒေသခံအရပ်သားပြည်သူတွေဟာ လက်ရှိအခြေအနေအရ တိုက်ပွဲတွေပြန်လည်ဖြစ်ပွားနေတာမို့ နေရပ်ပြန်နိုင်ဖို့က အဆင်မပြေနိုင်သေးဘူးလို့ စစ်ရှောင်အရေး ကူညီဆောင်ရွက်ပေးနေသူတွေရဲ့ ပြောကြားချက်အရ သိရပါတယ်။
