●ပြည်သူ ၁၆ ဦးထက်မနည်းဖမ်းဆီးခံရ
စစ်ကိုင်းတိုင်း မုံရွာမြို့တွင် အားလုံးစုဝေးနှစ်ခြောက်လုံးနေ့၌ ဆန္ဒပြပြည်သူများအား စစ်ကောင်စီတပ်ကအကြမ်းဖက်လိုက်လံဖြိုခွင်းရာ ကိုယ်ဝန်ဆောင်အမျိုး သမီးတစ်ဦး ကိုယ်ဝန်ပျက်ကျသွားကြောင်း ဒေသခံများက ပြောသည်။
အားလုံးစုဝေး နှစ်ခြောက်လုံးနေ့တွင် မုံရွာမြို့၌ ပြည်သူများက စစ်အာဏာရှင်အလိုမရှိကြောင်း ဆန္ဒပြခဲ့ရာ အကြမ်းဖက်စစ်တပ်မှအရပ်ဝတ်ကားများဖြင့် ပြည်သူများကို လိုက်လံဖမ်းဆီးခဲ့ကြောင်း၊ ပစ်ခတ်ဖမ်းဆီးမှုများရှိခဲ့ပြီး ကျည်ထိမှန်သူများလည်းရှိကာ ဖမ်းဆီးခံရသူ ၁၆ဦးထက်မနည်းရှိကြောင်း မုံရွာအခြေစိုက် ချင်းတွင်းရိုးမစာမျက်နှာက ဖော်ပြသည်။ထိုအပြင်ယနေ့နံနက်အစောပိုင်းက သပိတ်ကိုအရပ်ဝတ်ကားများဖြင့် လိုက်လံဖြိုခွင်း၍ ထွက်ပြေးစဥ် ကိုယ်ဝန်ဆောင်အမျိုးသမီးတစ်ဦး ဆိုင်ကယ်လူကြုံလိုက်ရန် ဆိုင်ကယ်ပေါ်တက်စဥ် နှင်းဆီပန်းပွင့်ကိုင်ထားသောကြောင့် ဆိုင်ကယ်သမားကတွန်းချခဲ့သဖြင့် နေ့လယ်ပိုင်းတွင်ထိုအမျိုးသမီး ရင်သွေး ဆုံးရှုံးလိုက်ရကြောင်းသိ့ရသည်။
“မနက်ကိုယ်ဝန်ဆောင်သည်ကလေးပျက်ကျသွားပါတယ်။”ဟု ဆန္ဒပြရာတွင် ပါဝင်သူလူငယ်တစ်ဦးက ပြောသည်။
Public Service Announcement
ထို့အပြင်အကြမ်းဖက် စစ်ကောင်စီတပ်၏ ပစ်ခတ်မှုကြောင့်ဒဏ်ရာရရှိသူသုံးဦးထက်မနည်းရှိကြောင်း၊ စစ်တပ်က လူစုခွဲ အုပ်စုဖွဲ့၍ အရပ်ဝတ်များဝတ်ဆင်ပြီး ပြည်သူအသွင်ဆောင်ကာဖမ်းဆီးပစ်ခတ်ခဲ့ခြင်းဖြစ် ကြောင်း ဒေသခံများက ပြောသည်။
မုံရွာမြို့တွင် အကြမ်းဖက်စစ်ကောင်စီသည် မြို့ပြပြောက်ကျားအဖွဲ့များ၏ တိုက်ခိုက်မှု မကြာခဏခံနေရ၍ ပြည်သူများအား မြို့တွင်းလှည့်လည်ကာ ပိုမိုတင်းကျပ်စွာစစ်ဆေးနေသည်။
စစ်ကောင်စီတပ်က အကြမ်းဖက်မှုများပြုလုပ်ခဲ့သော်လည်း ယနေ့နံနက်ပိုင်းတွင် မုံရွာသပိတ်ဦးဆောင်ကော်မတီနှင့် ကျောင်းသားသမဂ္ဂတို့သည် စစ်အာဏာရှင်ပြုတ်ကျရေး ဆန္ဒထုတ်ဖော်ခဲ့ကြသည်။
