မန္တလေးတိုင်း မတ္တရာမြို့နယ် သဖန်းကိုင်းရွာသို့ ရောက်ရှိနေသည့် အကြမ်းဖက်စစ်ကောင်စီတပ်က အဆိုပါရွာအနီးရှိ တဲများကိုမီးရှို့နေပြီး ရွာသူ၊ရွာသားများအား ဆိုင်ကယ်များလာရောက်အပ်နှံခိုင်းနေကြောင်း မတ္တရာဒေသခံတစ်ဦးက သတင်းပေးပို့သည်။
အင်အား ၅၀ခန့်ပါစစ်ကောင်စီအဖွဲ့သည် မတ်လ ၂ရက် နေ့လယ်က သဖန်းကိုင်းရွာကိုရောက်ရှိပြီး ယနေ့နံနက်တွင် ရွာအနီးသို့ရှာဖွေစစ်ဆေးမှုများ လုပ်ဆောင်ကာ ဒေသခံ တစ်ဦးကိုဖမ်းဆီးထားသည်ဟု ဆိုသည်။
“ သဖန်းကိုင်း မြောက်ဘက်မှာရှိတဲ့ ဦးပေါလှိုင်ဆိုတဲ့ပုဂ္ဂိုလ်တစ်ယောက်ကို ဖမ်းလာတယ်။ ပြီးတော့သဖိုင်းကိုင်း မြောက်ဘက်နဲ့အရှေ့ဘက်မှာ တောတိုက်တွေကတဲတွေကို မီးရှို့တာရှိတယ်။ လက်ရှိမီးရှို့နေတာပေါ့။ မီးရှို့တဲ့သူက ရှို့နေသလိုရှို့ထားခဲ့ပြီးတော့ရွာထဲ ပြန်ဝင်လာတယ်။ ပြန်ဝင်လာပြီး ရွာထဲမှာရှိတဲ့ဆိုင်ကယ်တွေ ကိုလာပို့ပါဆိုပြီးပို့ခိုင်းနေတယ်။ရွာထဲကလူတွေက လည်းရွာ ကိုမီးရှို့မှာစိုးတော့ ဆိုင်ကယ်လောက်နဲ့ဘာမှ မဖြစ်ဘူးဆိုပြီး ဆိုင်ကယ်တွေ သွားသွားပို့နေရတယ်။ ဆိုင်ကယ် အစီး ၂၀၊၂၅စီးလောက်ရသွားပြီပြောတယ်” ဟု အဆိုပါဒေသခံက ပြောသည်။
ယခင်ကလည်း သဖန်းကိုင်းရွာရှိနေအိမ် ၁၀လုံးကို စစ်ကောင်စီတပ်က မီးရှို့ဖျက်ဆီးဖူး၍ ဒေသခံများအနေဖြင့် ယခု ရွာမီးရှို့ခံရမည်ကို စိုးရိမ်နေကြသည်ဟု ဆိုသည်။