ယူကရိန်းအပေါ် ရုရှား၏ စစ်ရေးကျူးကျော်မှုနှင့်ပတ်သက်၍ ကုလသမဂ္ဂအထွေထွေညီလာခံ၌ မဲခွဲဆုံးဖြတ်ရာတွင် မြန်မာသံအမတ်ကြီး ဦးကျော်မိုးထွန်းက ထောက်ခံမဲပေးခြင်းကို ပြင်သစ်သံရုံးက ကြိုဆိုကြောင်း ယနေ့ ထုတ်ပြန်သည်။
အထက်ပါ မဲခွဲဆုံးဖြတ်မှုတွင် ထောက်ခံမဲ ၁၄၁ မဲ၊ ကန့်ကွက်မဲ ၅ မဲ၊ ကြားနေမဲ ၃၅ မဲဖြင့် ကုလသမဂ္ဂအထွေထွေညီလာခံက အတည်ပြုဆုံးဖြတ်ခဲ့ပြီး သံအမတ်ကြီး ဦးကျော်မိုးထွန်းက မြန်မာနိုင်ငံကိုယ်စား ထောက်ခံမဲပေးခဲ့ခြင်းဖြစ်သည်။
မြန်မာနိုင်ငံသည် စစ်တပ်၏ လူမဆန်စွာ ရက်စက်ကြမ်းကြုတ်မှုများကို ရင်ဆိုင်နေရသည့်အတွက် ယူကရိန်းပြည်သူများ ကြုံတွေ့နေရသောဒုက္ခများကို တခြားသူများထက် ပိုမိုနားလည်မျှဝေခံစားနိုင်ကြောင်း သံအမတ်ကြီး ဦးကျော်မိုးထွန်းက မဲခွဲမှုမပြုမီ ကုလ သမဂ္ဂ၌ ပြောကြားခဲ့သည်။
ဆုံးဖြတ်အတည်ပြုခဲ့သည့် အဆိုမှာ ရုရှားက ယူကရိန်းအပေါ် ကျူးကျော်ရန်စမှုများကို ပြတ်သားစွာရှုတ်ချထားပြီး ရုရှား၏ စစ်အင်အားလုံးကို ယူကရိန်းပိုင်နက်အတွင်းမှ ခြွင်းချက်မရှိ ချက်ချင်းဆုတ်ခွာပေးရန် တောင်းဆိုထားသည်။
Public Service Announcement
သို့ရာတွင် ကုလသမဂ္ဂအထွေထွေညီလာခံ၏ ဆုံးဖြတ်အတည်ပြုချက်သည် စည်းနှောင်မှုမရှိသဖြင့် ရုရှားက ယင်းဆုံးဖြတ်ချက်ကို လိုက်နာဆောင်ရွက်ခြင်းမရှိပါက မည်သို့မျှ အရေးယူ၍ မရပေ။
ပြီးခဲ့သည့် မတ်လ ၂ရက်တွင် ပြင်သစ်သမ္မတ Emmanuel Macron က မိန့်ခွန်းပြောကြားခဲ့ရာ ရုရှားတပ်ဖွဲ့များက ကိယက်ဗ်မြို့ကို ဗုံးကြဲတိုက်ခိုက်နေကာ နိုင်ငံအတွင်း မြို့ကြီးများကို ဝိုင်းထားသောကြောင့် လူများ ရာနှင့်ချီ၍ သေဆုံးခဲ့ရပြီး ဒုက္ခသည် ရာနှင့်ချီ၍ ပြေးနေကြရကြောင်း ထည့်သွင်းပြောကြားသည်။
