ဖလမ်းမြို့နယ် ရိခေါ်ဒါရ်မြို့ကို ရဟတ်ယာဉ်ဖြင့် ပြောင်းရွှေ့ပေးခဲ့သည့် ရဲတပ်သား လေးဦးက ဒေသခံကာကွယ်ရေးတပ်များထံ ဝင်ရောက်ခိုလှုံလာသည်ဟု ချင်းပြည်နယ်အခြေစိုက်သတင်းဌာနများတွင် ဖော်ပြထားသည်။
၎င်းတို့ကို ဖလမ်းမြို့မှ ရိခေါ်ဒါရ် မြို့ကို ဖေဖော်ဝါရီ ၂၆ ရက်က ပြောင်းရွှေ့ခဲ့ရပြီး ၈ရက်အကြာ မတ် ၆ရက်တွင် ဖလမ်းမြို့နယ် ရိခေါ်ဒါရ်မြို့ အမှတ် (၂)ရပ်ကွက် (တီအိုချောင်း) တောင်ကုန်းတပ်စခန်းမှ လက်နက်မပါဘဲ ဒေသခံကာကွယ်ရေးတပ်များထံ ခိုလှုံလာခြင်းဖြစ် သည်။
၎င်းတို့သည် ချင်းတိုင်းရင်းသားများဖြစ်ပြီး အချင်းချင်းမတိုက်လိုသည့်အတွက်ကြောင့် လက်နက်မပါဘဲ အိန္ဒိယနိုင်ငံသို့ ထွက်ပြေးလာပြီး ဒေသခံကာကွယ်ရေးတပ်များထံ ခိုလှုံလာခြင်းဖြစ်သည်ဟု ဒေသခံများထံမှ သိရသည်။
“အလုပ်ကိစ္စနဲ့ မြို့ထဲကိုထွက်ရတဲ့ အချိန်မှ အရပ်ဝတ်နဲ့ပဲ ထွက်ပြေးလာတာလို့ သိရတယ်။ အခုတော့ လုံခြုံတဲ့နေရာမှ ရှိနေပါပြီ”ဟု ရိခေါ်ဒါရ် ဒေသခံတစ်ဦးက ပြောသည်။
Public Service Announcement
၎င်းတို့ကို ဒေသခံကာကွယ်ရေးတပ်များက လွတ်မြောက်နယ်မြေကို ပို့ဆောင်ထားပြီး ၎င်းတို့၏ မိသားစုများပါ အဆိုပါနယ်မြေကို ပို့ဆောင်ထားပြီးဖြစ်သည်ဟု ဒေသခံကာကွယ်ရေးတပ်များနှင့် နီးစပ်သူတစ်ဦးက ပြောသည်။
ခိုလှုံလာသည့် ရဲလေးဦးတွင် ရဲဒုတပ်ကြပ်တစ်ဦးနှင့် ရဲသားအဆင့် သုံးဦးပါဝင်သည်။ ၎င်းတို့မှာ ရဲဒုတပ်ကြပ် တွန်ပေါင်ပြန်၊ ရဲတပ်သား ကမ့်ဒိမ့်ပေါင်၊ ရဲတပ်သား လားတီရယ်ထန်နှင့် ရဲတပ်သား ထန်ကြွမ်မန်တို့ဖြစ်သည်ဟု ဒေသတွင်းမီဒီယာများက ဖော်ပြထားသည်။
အကြမ်းဖက်စစ်ကောင်စီတပ်သည် ဖလမ်းမြို့နယ် ရိခေါ်ဒါရ်မြို့တွင် မတ် ၁ ရက်ကတည်းက အင်အား ၃၀ခန့်ဖြင့် စခန်းချတပ်စွဲနေခြင်းဖြစ်သည်။ ထိုစခန်းကို ဒေသခံကာကွယ်ရေးတပ်များက အကြိမ်ကြိမ်တိုက်ခိုက်လျက်ရှိသည်။
