စစ်အာဏာသိမ်းတာကိုဝေဖန်ခဲ့တဲ့ မြန်မာသံအမတ် ဦးကျော်စွာမင်းကို လက်ရှိနေထိုင်တဲ့ သံအမတ်ကြီးနေအိမ်ကနေ ထွက်ခွာပေးဖို့ ဗြိတိန်အစိုးရက တိုက်တွန်းထားတယ်လို့ ရိုက်တာသတင်းဌာနက ဖော်ပြပါတယ်။
ဖမ်းဆီးခံထားရတဲ့ သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကိုပြန်လွှတ်ပေးဖို့ သံအမတ်ကြီး ဦးကျော်စွာမင်းက ပြီးခဲ့တဲ့နှစ် မတ်လအတွင်းက ကြေညာချက်ထုတ်ပြန်ခဲ့ဖူးပါတယ်။
သံအမတ်ကြီးရာထူးကို ဒေါ်အောင်ဆန်းစုကြည်က ခန့်အပ်ခဲ့တာကြောင့် ဒေါ်အောင်ဆန်းစုကြည်ရဲ့ညွှန်ကြားမှုအောက်မှာ ဆက်လက်တာဝန်ထမ်းဆောင်မယ်လို့လည်း အဲဒီကြေညာချက်ထဲမှာ ဖော်ပြထားခဲ့ပါတယ်။
အဲဒီနောက်မှာတော့ လန်ဒန်မြို့က မြန်မာသံရုံး မှာရှိတဲ့ စစ်ကောင်စီသစ္စာခံလူတွေက သံရုံးကိုထိန်းချုပ်လိုက်ပြီး သံအမတ်ကြီး ဦးကျော်စွာမင်းကို သံရုံးထဲ ဝင်ခွင့်မပြုတော့သလို စစ်ကောင်စီကလည်း သံအမတ်ကြီး ရာထူးကနေ ဖယ်ရှားလိုက်ပါတယ်။
Public Service Announcement
ဒါပေမယ့် သံအမတ်ကြီးနေအိမ်မှာ ဦးကျော်စွာမင်းက ဆက်လက်နေထိုင်နေတာဖြစ်ပါတယ်။
သံအမတ်ကြီးနေအိမ်ဟာ လန်ဒန်အနောက်မြောက်ပိုင်းမှာ တည်ရှိပါတယ်။
သံဆူးကြိုးတွေ ၊ လုံခြုံရေးကင်မရာတွေတပ်ဆင်ထားတဲ့ အဲဒီသံအမတ်ကြီးနေအိမ် ကို လက်ရှိအချိန်ဟာ တရားမဝင်အစိုးရ ဖြစ်နေတာကြောင့် သံရုံးထံ ပြန်အပ်ဖို့ ဦးကျော်စွာမင်းက ငြင်းဆိုထားပါတယ်။
သံအမတ်ကြီးနေအိမ်မှာ ဦးကျော်စွာမင်း ဆက်လက်နေထိုင်နေတဲ့ကိစ္စကို ဖြေရှင်းပေးဖို့ စစ်ကောင်စီထံက ဖိအားပေးတာ ရှိနေကြောင်း ဗြိတိန်နိုင်ငံခြားရေးဝန်ကြီးဌာနရဲ့အကြီးတန်းအရာရှိ တစ်ဦးက ဦးကျော်စွာမင်းထံ မတ်လ ၄ ရက် က အီးမေးလ်ပေးပို့လာပါတယ်။
ဦးကျော်စွာမင်း သံအမတ်ကြီးနေအိမ်ကနေ မထွက်ခွာတာဟာ မြန်မာနိုင်ငံမှာရှိနေတဲ့ဗြိတိန်သံရုံး ဝန်ထမ်းတွေအတွက် ဥပဒေကြောင်းအရ ပြဿနာရှိစေနိုင်တယ်လို့ဆိုထားပါတယ်။
ဒီကိစ္စနဲ့ပတ်သက်ပြီး ဗြိတိန်နိုင်ငံခြားရေးရုံးကတော့ တိုက်ရိုက်ဖြေကြားတာမရှိပေမယ့် ဝန်ကြီးဌာနရဲ့ ပြောခွင့်ရပုဂ္ဂိုလ်ကတော့ ဦးကျော်စွာမင်းဟာ ဒီမိုကရေစီအတွက် ရဲရင့်စွာ ထောက်ခံအားပေးခဲ့တယ်လို့ ရိုက်တာသတင်းဌာနကို ပြောထားပါတယ်။
ဒါအပြင် ဦးကျော်စွာမင်းနဲ့ မိသားစုဝင်တွေ ဗြိတိန်မှာ အခြေချနိုင်ဖို့ ထောက်ပံ့ပေးသွားမယ်လို့လည်း ပြောပါတယ်။
ဦးကျော်စွာမင်းကတော့ ဗြိတိန်နိုင်ငံခြားရေးဌာနက ပေးပို့တဲ့ အီးမေးလ်နဲ့ပတ်သက်ပြီး မှတ်ချက်ပေးဖို့ငြင်းဆန်ခဲ့ပေမယ့် ဒေါ်အောင်ဆန်းစုကြည် ပြန်လွှတ်လာတာ ဒါမှမဟုတ် ဗြိတိန်က အသိအမှတ်ပြုတဲ့ မြန်မာအစိုးရ မတက်လာမချင်း သံအမတ်နေအိမ်ကနေ ထွက်ခွာပေးမှာမဟုတ်ကြောင်း သူရဲ့သဘောထားကိုပြောပါတယ်။
