နွားထိုးကြီးနှင့် ​တောင်သာတွင် စစ်​ကောင်စီတပ်က ​ဒေသခံရှစ်ဦးထက်မနည်း သတ်ဖြတ်ပြီး လမ်း​ဘေးစွန့်ပစ်ထား

မန္တလေးတိုင်း နွားထိုးကြီးနှင့် တောင်သာမြို့နယ်များတွင် အကြမ်းဖက်စစ်ကောင်စီတပ်က ​ဒေသခံပြည်သူ ရှစ်ဦးထက်မနည်း သတ်ဖြတ်ပြီး လမ်းဘေးတွင် စွန့်ပစ်သွားကြောင်း ဒေသခံများက ပြောသည်။

ယနေ့(မတ်လ ၁၃ ရက်) နံနက်ပိုင်းက မြင်းခြံခရိုင်၊ မြင်းခြံ-နွားထိုးကြီးလမ်းမဘေးတွင်ရှိသည့် သာယာကုန်းဂိတ်အနီးတွင် ရုပ်အလောင်း နှစ်လောင်းအား အကြမ်းဖက် စစ်တပ်က လာရောက်စွန့်ပစ်သွားခဲ့ခြင်းဖြစ်ပြီး မည်သူမည်ဝါဆိုသည်ကိုမူ မသိရသေး​ကြောင်း ဒေသခံများက ပြောသည်။

အကြမ်းဖက်စစ်ကောင်စီတပ်သည် နွားထိုးကြီးမြို့ မင်းရွာကျေးရွာရှိ စစ်ကောင်စီသတင်းပေးနှစ်ဦးအသတ်ခံရသည့်ကိစ္စနှင့်ပတ်သက်၍ ယမန်နေ့ညက ၎င်းကျေးရွာများမှ ပြည်သူ ​ခြောက်ဦးကို ဖမ်းဆီးခဲ့ကြောင်း၊ ယနေ့နံနက်တွေ့ရှိရသည့် ရုပ်အလောင်းများမှာ အဆိုပါဖမ်းဆီးခံရသူများမဟုတ်ဘဲ မျက်နှာစိမ်းများဖြစ်သည်ဟု နွားထိုးကြီးဒေသခံအချို့က ပြောသည်။

ထို့အပြင် မတ်လ ၁၁ ရက် ညကလည်း တောင်သာမြို့နယ် နန်းမြင့်ရွာ၊ ဘုရားလှရွာနှင့် ဖက်တောရွာများ အနီးတွင် အကြမ်းဖက်စစ်တပ်က ရုပ်အလောင်း​ခြောက် လောင်းထက်မနည်း လာရောက်စွန့်ပစ်သွားခဲ့ကြောင်း ဒေသခံများက ပြောသည်။

Public Service Announcement

“ပျူစောထီးတွေ နဲ့ အကြမ်းဖက်စစ်သားတွေ အလောင်း ​ခြောက်လောင်းကို နန်းမြင့်ရွာနဲ့ ဘုရားလှရွာအနီးမှာ လာရောက် ပစ်ထားခဲ့တယ်လို့သိရပါတယ် ။နန်းမြင့်ရွာ နဲ့ ဘုရားလှရွာကြားမှာ တစ်လောင်း၊ ဘုရားလှရွာနဲ့ ဖက်တောရွာကြားမှာ ၅လောင်း လာပစ်ထားပြီး ယနေ့ မနက်အစောက အလောင်းတွေကို လူနာတင်ကားနဲ့ ကောက်ပြီး တောင်သာဆေးရုံကို သယ်သွားတယ်လို့သိရတယ်။”ဟု မြင်းခြံလူထုလှုပ်ရှားမှုကော်မတီမှ ထုတ်ပြန်ထားသည်။

မြင်းခြံနှင့်နွားထိုးကြီးမြို့နယ်များသည် မန္တလေးတိုင်းအတွင်း၌ စစ်ကောင်စီတပ်၏ ဖိနှိပ်အကြမ်းဖက် အခံရဆုံးသော မြို့နယ်များတွင်ပါဝင်ပြီး မိုဘိုင်းအင်တာနက်များလည်း ဖြတ်တောက်ခံထားရသည်။