ရန်ကုန်မြို့ လှိုင်သာယာမြို့နယ်တွင် စစ်အာဏာရှင်ဆန့်ကျင်ရေးဆန္ဒပြသူများအား အစုလိုက်၊အပြုံလိုက်အကြမ်းဖက်သတ်ဖြတ်ခံရသည့် တစ်နှစ်ပြည့်အဖြစ် စနေမ နှင့် BOC မှတ်တိုင်ကြား၌ စစ်ကောင်စီတပ်ကို ဗုံးခွဲ တိုက်ခိုက်ခဲ့ကြောင်း From Zero To Hero က ထုတ်ပြန်သည်။
ယနေ့(မတ်လ ၁၄ ရက်) ညနေ ၃နာရီခန့်က စနေမ နှင့် BOC မှတ်တိုင်ကြား ပန်းခြံထောင့်၌ စစ်ကောင်စီတပ်များကင်းလှည့်လာစဥ် တိုက်ခိုက်နိုင်ခဲ့ခြင်းဖြစ်ကြောင်း From Zero To Hero အဖွဲ့ တာဝန်ရှိသူတစ်ဦးကဆိုသည်။
“စခတချို့ အထိအခိုက်အနည်းငယ်ရှိခဲ့တယ်။ သေ၊မသေတော့ ကျွန်တော်တို့ မသိရသေးဘူး”ဟု ၎င်းက People’s Springသို့ ပြောသည်။
လှိုင်သာယာမြို့နယ်အတွင်း ငြိမ်းချမ်းစွာဆန္ဒပြသည့်ပြည်သူများကို အာဏာသိမ်းစစ်ကောင်စီက အစုလိုက် ၊အပြုံလိုက် ရက်ရက်စက်စက်သတ်ဖြတ်နှိမ်နင်းခဲ့သည်မှာ ယနေ့( မတ်လ ၁၄)တွင် တစ်နှစ်တိတိပြည့်မြောက်ခဲ့ခြင်းဖြစ်သည်။
နိုင်ငံတကာလူ့အခွင့်အရေးစောင့်ကြည့်ရေးအဖွဲ့ ကြီး (HRW) ၏မှတ်တမ်းအရ အဆိုပါမြို့နယ်တွင် ၆၅ဦးထက်မနည်း သတ်ဖြတ်ခံရခြင်းဖြစ်ကြောင်း သိရသည်။
လှိုင်သာယာမြို့အဝင် အောင်ဇေယျတံတားထိပ်မှစတင်ကာ စစ်အာဏာရှင်ဆန့်ကျင်ရေးသပိတ် အတားအဆီးများကို စစ်တပ်က မီးရှို့ဖျက်ဆီး၍ မြို့ကို စနစ်တကျ ပိတ်ဆို့ကာ ပစ်ခတ်သတ်ဖြတ်မှုများလုပ်ခဲ့ခြင်း ဖြစ်သည်။
(စစ်ကောင်စီတပ်၏ ပစ်ခတ်မှုကြောင့် ဆန္ဒပြပြည်သူတစ်ဦး လဲကျသေဆုံးနေစဥ်၊ ဓာတ်ပုံ – AFP)