ရန်ကုန်မြို့ လှိုင်မြို့နယ်ရှိ ပညာရေးဌာနမှ Non-CDM ဝန်ထမ်းများနေထိုင်သော ဝန်ထမ်းလိုင်းခန်းအနီး သတိပေးဖောက်ခွဲမှုပြုလုပ်ခဲ့ကြောင်း မြို့ပြပြောက်ကျားတပ်ဖွဲ့ Generation Z Defence Force (GZDF)က ယနေ့(မတ် ၁၆) ထုတ်ပြန်သည်။
ယနေ့နံနက် ၅ နာရီ ၁၀မိနစ်ခန့်က လှိုင် (၁၂)ရပ်ကွက် မင်းဓမ္မပညာရေးရိပ်သာအနီး C4 ဗုံးတစ်လုံးနှင့် အသံဗုံးတစ်လုံးတို့ကို ဖောက်ခွဲခဲ့ကြောင်း ထုတ်ပြန်ချက်တွင် ဖော်ပြသည်။
“အဲ့ဘက်က အဆင့်မြင့်ပညာဝန်ထမ်းအိမ်ယာတော့ရှိတယ်။ ဘာကြောင့်ခုလို ပေါက်ကွဲမှုဖြစ်တယ်ဆိုတာတော့ သေချာမသိဘူး”ဟု လှိုင်မြို့ နယ်မှ ဒေသခံတစ်ဦးက ပြောသည်။
GZDF တပ်ဖွဲ့အနေဖြင့် စစ်ကောင်စီလက်အောက်၌ တာဝန်ထမ်းဆောင်နေကြသော Non-CDM ဝန်ထမ်းများအနေဖြင့် ပြည်သူနှင့်အတူ အမြန်ဆုံးပူးပေါင်းရန် သတိပေးဖောက်ခွဲခြင်းဖြစ်ကြောင်း ယင်းအဖွဲ့မှ ရဲဘော်တစ်ဦးက မှတ်ချက်ပေးသည်။
အထက်ပါ သတိပေးဖောက်ခွဲမှုကို Human Right Defender (HRD)နှင့် Generation Z Defence Force (GZDF) ပူးပေါင်းအဖွဲ့တို့မှ လုပ်ဆောင်ခဲ့ကြောင်း အသိပေးထားသည်။