အကြမ်းဖက်စစ်ကောင်စီ၏ လက်ရှိလုပ်ဆောင်နေမှုများသည် လူသားမျိုးနွယ် အပေါ်ဆန့်ကျင်သောရာဇဝတ်မှု(crime against humanity)နှင့် စစ်ရာဇ ဝတ်မှု(war crime)မြောက်ကြောင်း အမျိုးသားညီညွတ်ရေးအစိုးရ(NUG)က သတ်မှတ်လိုက်သည်။
လက်ရှိကျင်းပနေဆဲ ကုလသမဂ္ဂလူ့အခွင့်အရေးကောင်စီအစည်းအဝေးသို့ NUGက ‘နိုင်ငံတကာ က အရေးယူရန်လိုအပ်သည့် စစ်ကောင်စီ၏ ဆိုးရွားသောရာဇဝတ်မှုများ’အမည်ရှိ အစီရင်ခံကို တင်သွင်းခဲ့ရာ ယင်းသို့ ထည့်သွင်းသတ်မှတ်ဖော်ပြခြင်းဖြစ်သည်။
“ဒီနေ့ထုတ်ပြန်တဲ့ လူ့အခွင့်အရေးဆိုင်ရာ မဟာမင်းကြီးရုံးရဲ့ အစီရင်ခံစာ မှာဆိုရင်လည်း စစ်ကောင်စီရဲ့ လုပ်ရပ်တွေက Crime against Humanity ရော၊ War Crime ရော မြောက်နေပါပြီလို့ ထုတ်ပြန်ပြောဆိုတာဖြစ်တဲ့အတွက် ကျွန်တော်တို့ကောက်ချက်၊ ကျွန်တော်တို့ တင်ပြချက်နဲ့ ကိုက်ညီတာကို တွေ့ရပါတယ်”ဟု NUG လူ့အခွင့်အရေးဆိုင်ရာဝန်ကြီး ဦးအောင်မျိုးမင်းက ပြောသည်။
ကုလသမဂ္ဂလူ့အခွင့်အရေးကောင်စီသို့ တင်သွင်းသော အစီရင်ခံစာနှင့် ပတ်သက်၍ “လက်ရှိ war crime တွေ crime against humanity တွေကို ကျူးလွန်နေတဲ့ ရာဇဝတ်မှုတွေ အားလုံးအမြန်ဆုံးရပ်တန့်ဖို့အတွက် ကျွန်တော်တို့ တိုင်းပြည်က ပြည်သူတွေက ကိုယ့်အား ကိုယ်ကိုးပြီး ကြိုးစားနေသလို နိုင်ငံတကာကလည်း တကယ့် ထိထိရောက်ရောက် ဝိုင်းဝန်းတားဆီးပေးဖို့အတွက် တောင်းဆိုထားတဲ့ အစီရင်ခံစာလည်းဖြစ်ပါတယ်”ဟု ၎င်းက ဆက်ပြောသည်။
Public Service Announcement
နိုင်ငံတဝန်း၌ အကြမ်းဖက်စစ်ကောင်စီ၏ လုပ်ရပ်များတွင် အစုလိုက်အပြုံလိုက် နှင့် ဥပဒေမဲ့သတ်ဖြတ်မှုများ၊ လက်နက်ကြီးများနှင့် လေကြောင်းတိုက်ခိုက် မှုများဖြင့် အရပ်သားပစ်မှတ်၊ စစ်ရေးပစ်မှတ် မခွဲခြားဘဲ ပစ်ခတ်မှုများ၊ ပြည်သူများ၏ အိုးအိမ်ပိုင်ဆိုင်မှုများကို ရည်ရွယ် ချက်ရှိရှိ အကြီးစားမီးလောင် တိုက်သွင်းမှုများ၊ ဖျက်ဆီးမှုများနှင့် ငြိမ်းချမ်းစွာဆန္ဒထုတ်ဖော်နေသူများကို အသက်သေစေနိုင်လောက်သည့် အင်အားအသုံးပြု၍ဖြိုခွင်းခြင်းများပါဝင်သည်။
