ကချင်ပြည်နယ် မြစ်ကြီးနားမြို့ နှင့် နမ္မတီးမြို့ အကြားရှိ အကြမ်းဖက်စစ်ကောင်စီတပ်၏ ၂၁ မိုင် စုပေါင်းဂိတ်ကို ကချင်လွတ်လပ်ရေးတပ်မတော်(KIA)နှင့်ပြည်သူ့ကာကွယ်ရေးတပ်(PDF) တို့ ပူးပေါင်း တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုများနိုင်သည်ဟု kIA သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီး နော်ဘူက ပြောကြားသည်။
မတ်လ ၁၉ ရက် နံနက် ၄နာရီနှင့် ၆နာရီကြားတွင် ၂၁မိုင်စုပေါင်းဂိတ်ကို ဝင်ရောက်တိုက်ခိုက်သိမ်းပိုက် ခဲ့သည်ဟုသိရသည်။
“ဝင်တိုက်ပြီးမှ အကုန်လုံး မီးရှို့ပစ်လိုက်ပြီ။ ကျွန်တော်တို့ဘက်က အဲဒီမှာ ပြန်ထိုင်တာမရှိပါဘူး။ အဲဒီအချိန်မှာ စကစ ဘက်ကနဲ့ စစ်ကူတွေ ရောက်လာလို့ လေကြောင်းကလည်းတိုက်တယ် အဲဒီတော့ ကျွန်တော်တို့လည်း ပြန်ဆုတ်သွားတာ” ဟုဗိုလ်မှူးကြီးနော်ဘူက People’s Spring သို့ ပြောသည်။
အဆိုပါ တိုက်ခိုက်မှု၌ စစ်ကောင်စီတပ်မှ ထိခိုက်ကျဆုံးမှု များနိုင်ကြောင်း ၄င်းကဆိုသည်။
Public Service Announcement
“ဘာကြောင့်လဲဆိုတော့ မြစ်ကြီးနားဘက်ကလူနာတင်တဲ့ကားတွေ၊ နမ္မတီးဘက်လည်း လူနာတင်တဲ့ကားတွေ လာကြတာကို တွေ့ရတယ်။ ဆိုတော့ သူတို့ဘက်ကလည်း အထိအခိုက် အကျအဆုံး နည်းနည်းများဖို့ ရှိပါတယ်” ဟု ဗိုလ်မှူးကြီး နော်ဘူက ဆက်ပြောသည်။
တိုက်ပွဲအတွင်း စစ်ကောင်စီတပ်မှလက်နက်ခဲယမ်းသိမ်းဆည်းရရှိမှု အခြေအနေကို မေးမြန်းရာ ဗိုလ်မှူးကြီးနော်ဘူက KIO အနေဖြင့် ထို့သို့ အချက်အလက်များ သတင်းထုတ်ပြန်လေ့မရှိဟု ပြောသည်။
ထိုသို့ တိုက်ခိုက်ခံရပြီးနောက် စစ်ကောင်စီတပ်က အဆိုပါလမ်းကို ပိတ်ထားပြီး စစ်ဆေးမှုများ ပြုလုပ်ခဲ့သည်ဟုဆိုသည်။
