စစ်ရေးပြင်းထန်လာနိုင်ဖွယ်ရှိ၍ ပြည်သူများလုံခြုံရေးဂရုပြုရန် ကလေး PDF ​သတိ​ပေး

စစ်ကိုင်းတိုင်း ကလေးမြို့နယ် တောင်ပိုင်းဒေသသို့ အကြမ်းဖက် စစ်ကောင်စီတပ်က ထိုးစစ်ဆင်မှုများ ဆက်တိုက် ပြုလုပ်နေ၍ စစ်ရေးအခြေအနေများ ဆက်လက်ပြင်းထန်လာနိုင်ဖွယ်ရှိကြောင်း ကလေးမြို့နယ် ပြည်သူ့ကာကွယ်ရေးတပ်(PDF)က ယနေ့ ထုတ်ပြန်သည်။

အကြမ်းဖက်စစ်ကောင်စီတပ်သည် အဆက်မပြတ်ထိုးစစ်ဆင်တိုက်ခိုက်နေသည့်အပြင် ပြည်သူများအပေါ် အကြမ်းဖက်မှုနှင့်စစ်ရာဇဝတ်မှုများ ဆက်တိုက်ကျူးလွန်လျက်ရှိကြောင်း၊ ပြည်သူ့အသက်၊ အိုးအိမ်၊ စည်းစိမ်ကို ကာကွယ်ပေးနိုင်ရန် ကလေး PDF တပ်ဖွဲ့ဝင်များ အနေဖြင့် ရှိသည့် လက်နက်ခဲယမ်းအနည်းငယ်ဖြင့် အစွမ်းကုန် ရင်ဆိုင်ခုခံတိုက်ပွဲဝင်လျက်ရှိကြောင်း ဖော်ပြထားသည်။

စစ်ရေးအခြေအနေများဆက်လက် ပြင်းထန်လာနိုင်ဖွယ်ရာရှိသောကြောင့် ပြည်သူများအနေဖြင့် လုံခြုံရေးအထူးဂရုပြုကာ နေထိုင်သွားလာကြပါရန် မေတ္တာရပ်ခံကြောင်း ကလေး PDFက ထုတ်ပြန်သည်။

ကလေးတောင်ပိုင်းဒေသများရှိ ဒေသကာကွယ်ရေးတပ်များသည် စစ်ကောင်စီတပ်ကို ခုခံတိုက်ခိုက်မှုများ မကြာခဏ ပြုလုပ်လျက်ရှိသည်။ မတ်လ ၂၂ရက်နှင့် ၂၃ရက်ကလည်း စစ်ကောင်စီတပ်နှင့် ပျူစောထီးများကို ကလေး PDF က ခုခံတိုက်ခိုက်ခဲ့ရာ စစ်ကောင်စီတပ်များ ဘက်က ထိခိုက်သေဆုံးမှုများရှိကြောင်း ဖော်ပြထားသည်။

Public Service Announcement