ကရင်နီ(ကယား)ပြည်နယ် ဖရူဆိုမြို့အခြေစိုက် အကြမ်းဖက်စစ်ကောင်စီ၏ ခမရ(၄၂၈) တပ်ရင်းကို သွားရောက်တိုက်ခိုက်ခဲ့ကြောင်း ကရင်နီအမျိုးသားများ ကာကွယ်ရေးတပ်(KNDF) တပ်ရင်း-၄ က ယနေ့(မတ်လ ၂၈ရက်) ထုတ်ပြန်သည်။
ကရင်နီတပ်မတော်(KA)နှင့်အတူ KNDF တပ်ရင်း-၄ နှင့် တပ်ရင်း-၈ တို့ပူးပေါင်းကာ မတ်လ ၂၆ ရက်နှင့်၂၇ ရက် နှစ်ရက်တာ တိုက်ခိုက်ခဲ့သည်ဟု ဖော်ပြသည်။
အကြမ်းဖက်စစ်ကောင်စီတပ်ဘက်မှ ထိခိုက်ကျဆုံးမှုရှိသော်လည်း အတိအကျ အတည်မပြုနိုင် သေးဟု KNDF က ဆိုသည်။
ကရင်နီပြည်သူ့ကာကွယ်ရေးတပ်ပေါင်းစုမှ အထိအခိုက်မရှိ အောင်မြင်စွာ ဆုတ်ခွာနိုင်ခဲ့ သည်ဟုလည်း အသိပေးသည်။
မတ်လ ၂၅ ရက်လည်း ဖရူဆိုမြို့နယ် ငွေတောင်ရွာသစ်တွင် တပ်မ(၆၆)လက်အောက်ခံ တပ်နှင့် ကရင်နီတပ်ပေါင်းစုတို့ တိုက်ပွဲဖြစ်ပွားခဲ့ပြီး စစ်ကောင်စီတပ်သား ၁၀ဦးထက်မနည်း သေဆုံးပြီး ပြည်သူ့ကာကွယ်ရေးတပ်မှ ရဲဘော်တစ်ဦးကျဆုံးခဲ့ရသည်။
ဖရူဆိုမြို့နယ်တွင် အကြမ်းဖက်စစ်ကောင်စီ၏ ခမရ(၅၃၁)၊ ခမရ(၄၂၈)နှင့် အမှတ်(၁၄) လေ့ကျင့်ရေးတပ် တို့ ရှိသည်။
ထို့အပြင် ရှမ်း-ကရင်နီ(ကယား)ပြည်နယ်အစပ် မိုးဗြဲမြို့အခြေစိုက် အကြမ်းဖက်စစ်တပ်၏ ခမရ(၄၂၂)တပ်၏ ကင်းပုန်းစခန်းများကိုဝင်တိုက်ရာ စစ်ကောင်စီတပ်သားငါးဦး သေဆုံးကြောင်း ကရင် နီအမျိုးသားများ ကာကွယ်ရေးတပ်(KNDF)ဖယ်ခုံဇုန်က ယနေ့(မတ်လ ၂၈ရက်) ထုတ်ပြန်သည်။
တိုက်ပွဲ ဖြစ်စဥ်မှာ မတ်လ ၂၆ ရက် ည ၉ နာရီ မိနစ် ၂၀ခန့်က ၄၂၂တပ်စခန်းအနီး တစ်ဝှိုက်ရှိ ကင်းပုန်းစခန်းများအား KNDF တပ်ရင်း-၃ နှင့် တပ်ရင်း-၁၁ တို့က ပြောက်ကျားနည်းဖြင့် တိုက်ခိုက်ခဲ့သည်ဟု ဆိုသည်။
ကရင်နီအမျိုးသားများကာကွယ်ရေးတပ်မှ အထိအခိုက်မရှိ ပြန်လည်ဆုတ်ခွာ နိုင်ခဲ့ကြောင်း ထုတ်ပြန်ချက်တွင် ဖော်ပြသည်။