စစ်ကောင်စီအတွက် ဝါဒဖြန့်ဇာတ်ကားရိုက်မည့် အနုပညာရှင်အချို့လိုက်ပါလာသည့်ရထား ပြင်ဦးလွင်-ဂုတ်ထိပ် လမ်းပိုင်းတွင် မိုင်းခွဲတိုက်ခိုက်ခံလိုက်ရသည်။
စစ်တပ်ထောက်ခံသူ ရွှေရူပါဦးနှင့်ဒေါ်နွဲ့နွဲ့စန်းတို့အပါအဝင် အနုပညာရှင်အချို့ လိုက်ပါလာသည့် ရထားသည် ပြင်ဦးလွင်-ဂုတ်ထိပ်လမ်းပိုင်း ပိတ်ချင်းမြောင်အနီးတွင် ယနေ့(မတ်လ ၂၉ရက်)ညနေ ၄နာရီခန့်က မိုင်းဆွဲဖောက်ခွဲခံရခြင်းဟု ဒေသခံများက ပြောသည်။ မည်သည့်အနုပညာရှင်များ လိုက်ပါလာသည်ကို သီးခြားအတည်မပြုနိုင်သေးပေ။
“ပြင်ဦးလွင်မှာ ရုပ်ရှင်လား၊ သီချင်းလား မသိဘူး ရိုက်ဖို့လာကြတာ။ စစ်တပ်ကိုလော်ဘီလုပ်ပေးမယ့် သူတွေ ပါလာကြတာ။ မိုင်းကွဲတော့ သူတို့ လန့်နေကြတယ်။ ရထားကတော့ ရှေ့ဆက်သွားတာမတွေ့ဘူး”ဟု ဒေသခံတစ်ဦးက ပြောသည်။
အထက်ပါ ဖြစ်ရပ်ကြောင့် ရထားလမ်းပိုင်းပျက်စီးသွားသော်လည်း လူထိခိုက်မှုမရှိဟု ဆိုသည်။
Public Service Announcement
အကြမ်းဖက်စစ်ကောင်စီသည် ပြီးခဲ့သည့်ရက်ပိုင်းအတွင်း နာမည်ကြီး အနုပညာရှင်အချို့ကို လူမှုထူးချွန်ဆုများပေးအပ်ခဲ့ရာ အဆိုပါ အနုပညာရှင်များအား လူထုက ရှုတ်ချနေကြသည်။ စစ်ကောင်စီ၏ ဂုဏ်ပြုခံရသူများတွင် ဝင်းဦးကဲ့သို့ သေဆုံးပြီးသား အနုပညာရှင်အချို့လည်း ပါဝင်နေ၍ ရယ်ဖွယ်ဖြစ်နေသည်ဟု ပြည်သူများက မှတ်ချက်ပြုနေကြသည်။
