●စစ်ကောင်စီကဒေါ်လာလိုအပ်ချက်များနေပြီး ၊ပြည်သူများကိုဒေါ်လာမကိုင်ခိုင်းတော့ဘဲ မိုက်ကြေးခွဲသောလုပ်ရပ်ဟုလုပ်ငန်းရှင်များသုံးသပ်
ပြည်ပမှရသည့် နိုင်ငံခြားငွေများကို တစ်ရက်အတွင်း တစ်ဒေါ်လာကို ၁၈၅၀ ကျပ်နှုန်းဖြင့် ပြည်တွင်းဘဏ်များသို့ ရောင်းချရမည်ဟု အကြမ်းဖက်စစ်ကောင်စီထိန်းချုပ်ထားသည့် ဗဟိုဘဏ်က ဖိအားပေးထုတ်ပြန်သည်။
စစ်တပ်အာဏာသိမ်းပြီးနောက် နိုင်ငံခြားရငွေများကို လေးလအတွင်း ပြည်တွင်းဘဏ်များကို ရောင်းချရမည်ဟု ၂၀၂၁ စက်တင်ဘာ ၃ ရက်တွင်ကြေညာခဲ့သည်။ထိုနောက် တစ်လအကြာအောက်တိုဘာ ၃ ရက်တွင် ပို့ကုန်ရငွေများကို ရက်ပေါင်း ၃၀ အတွင်းရောင်းချရမည်ဟု ပြောင်းလဲသတ်မှတ်ခဲ့သည်။ ထိုနောက် ခြောက်လ အကြာတွင် တရက်အတွင်းရောင်းချရမည်ဟု စစ်ကောင်စီကဖိအားပေးလိုက်ခြင်းဖြစ်သည်။ အရပ်သားအစိုးရလက်ထက်တွင် ထိုသို့သတ်မှတ်ထားခြင်းမရှိဘဲ ဈေးကွက်အတိုင်းလွတ်လပ်ခွင့်ပေးခဲ့သည်။
ရောင်းချရမည့်ငွေများတွင် နိုင်ငံခြားမှ ရရှိလာသည့် နိုင်ငံခြားသုံးငွေ အားလုံးပါဝင်ခြင်းဖြစ်ပြီး ရောင်းချရာတွင်လည်း နှုန်းသေ ၁၈၅၀ကျပ်ဖြင့်သာရောင်းချရမည်ဟု သတ်မှတ်သည်။ အခြားနိုင်ငံခြားငွေများကိုလည်း တစ်ဒေါ်လာ ၁၈၅၀ကျပ်အပေါ်အခြေခံ၍ တွက်ချက်ရမည်ဟုလည်း စစ်ကောင်စီက ချုပ်ခြယ်ထားခြင်းဖြစ်သည်။ လက်ရှိတွင် ပြင်ပပေါက်ဈေးတွင် တစ်ဒေါ်လာကို ၂၀၅၀ကျပ်ပေါက်ဈေးရှိနေပြီး စစ်ကောင်စီသတ်မှတ်နှုန်းသည်လက်ရှိပြင်ပပေါက်ဈေးနှင့်နှိုင်းယှဥ်ပါက တစ်ဒေါ်လာကို ကျပ် ၂၀၀ လျော့နည်းနေသည်။
“တနင်္ဂနွေလို့ ပိတ်ရက်ကြီးမှာတောင် ရုံးအမိန့်စာထုတ်တယ်ဆိုကတည်းက သူတို့မှ နိုင်ငံခြားငွေလိုနေတယ်ဆိုတာ အရမ်းသိသာတယ်။ အခုက ၂၀၀၀ ခုနှစ်တုန်းကလို အကုန်လုံးထိန်းချုပ်ပြီး လူထုကို ဒေါ်လာပေးမကိုင်တော့တဲ့ သဘောပါပဲ”ဟု ငွေလဲကောင်တာပိုင်ရှင်တစ်ဦးကပြောသည်။
စစ်ကောင်စီကအဆိုပါသတ်မှတ်ချက်ကို ဧပြီ ၄ ရက်(ယနေ့)ကစတင်အသက်ဝင်မည်ဖြစ်ကြောင်း စစ်ကောင်စီခန့်ထားသည့် ဗဟိုဘဏ် ဥက္ကဌ ဦးသန်းညိန်းကဆိုသည်။ ထိုအပြင်ယခင်ဘဏ်အကောင့်များရှိ နိုင်ငံခြားငွေများကိုလည်း တစ်ရက်အတွင်း အပြီးသတ်ရောင်းချရမည့် စာရင်းထဲတွင်ပါဝင်သည်ဟုလည်းဖော်ပြသည်။
ထိုအပြင် ပြည်ပသို့ နိုင်ငံခြားငွေများလွှဲပြောင်းရာတွင် စစ်ကောင်စီ၏ နိုင်ငံခြားသုံးငွေကြီးကြပ်မူကော်မတီ၏ ခွင့်ပြုချက်ဖြင့်သာဆောင်ရွက်ရမည်ဟုကန့်သတ်လိုက်ပြန်သည်။
“Earning ငွေတွေကို မိုက်ကြေးခွဲ ပြန်ပေးဆွဲတယ်လို့ ပြောရမှာပေါ့”ဟုပို့ကုန်လုပ်ငန်းရှင်တစ်ဦးကပြောသည်။
မြန်မာနိုင်ငံတွင် ဒေါ်လာကို သုံးမျိုးအသုံးပြုနေပြီး Earning (ပို့ကုန်၊လစာရငွေ) ၊ငွေသားအရွက်နှင့် ပြည်ပ ရှိ ဒေါ်လာငွေသားတို့ဖြစ်သည်။ ယခု စစ်ကောင်စီက ထိန်းချုပ်နေသည့်မှာ ပို့ကုန်ရငွေနှင့် ဒေါ်လာဖြင့်ရသောလစာရငွေများကိုဖြစ်သည်ဟု စီးပွားရေးလုပ်ငန်းရှင်တစ်ဦးကပြောသည်။ ယခုလို့ ကန့်သတ်ခြင်းက ဒေါ်လာငွေသားအရွက်အပေါ်တွင် သက်ရောက်မူ များများမရှိနိုင်ကြောင်းနှင့် နိုင်ငံ့စီးပွားရေးအပေါ် တစ်ပတ်အတွင်း သက်ရောက်မူကြီးနိုင်သည်ဟု အထက်ပါပို့ကုန်လုပ်ငန်းရှင်ကသုံးသပ်သည်။
ယခင်က ပို့ကုန်ရငွေများကို ကုန်သည်အချင်းချင်းလွဲပြောင်းရောင်းချခွင့်ပေးသော်လည်း ယခု ကန့်သတ်ချက်တွင် ရောင်းချခွင့်မရတော့ကြောင်းလည်းလုပ်ငန်းရှင်အချို့ကပြောသည်။
အကြမ်းဖက်စစ်ကောင်စီ၏ အဆိုပါကန့်သတ်ချက်များပြဌာန်းပြီးနောက် ပြည်ပသို့အဓိကတင်ပို့သော ပဲမျိုးစုံဈေးမှာ တစ်တင်းလျှင် ကျပ် ၁၀၀၀ ကျော်ဈေးကျသွားကြောင်းလည်း ပဲနှမ်းကုန်သည်အချို့ကပြောသည်။