မွန်ပြည်နယ် သထုံမြို့နယ်အတွင်းရှိ စစ်ကောင်စီတပ်ဖွဲ့များအား သတင်းပေးနေသည့် ဒလန်များနှင့် စစ်ကောင်စီအလိုကျပါဝင်ဆောင်ရွက်ပေး နေသူများအနေဖြင့် စစ်ကောင်စီ အလိုကျ မည်သည့် ဆောင်ရွက်မှုမျိုးကိုမျှ ပါဝင်ဆောင်ရွက်ပေးခြင်းမပြုရန် နောက်ဆုံးအနေ ဖြင့် အလေးအနက် ထပ်မံသတိပေးလိုက်ကြောင်း သထုံပြည်သူ့ကာကွယ်ရေးတပ်(PDF)က သတိပေးထုတ်ပြန်သည်။
အဆိုပါ စစ်ကောင်စီ သတင်းပေးဒလန်များ၏ အမည်စာရင်းများ ရရှိနေပြီဖြစ်ကြောင်း၊ သတိပေးချက်ကို မလိုက်နာပါကထိုက်တန်သည့် လုပ်ဆောင်မှုများ ပြုလုပ်သွားမည် ဖြစ်ကြောင်း ဖော်ပြထားသည်။
သထုံ PDFသည် ဒေသတွင်းရှိ ကရင်အမျိုးသားအစည်းအရုံး(KNU) တပ်မဟာ(၁) လက်အောက်ခံတပ်များနှင့် ပူးပေါင်းပြီး စစ်ကောင်စီတပ်များကို ခုခံတိုက်ခိုက်နေသည့် အဖွဲ့ဖြစ်သည်။ မတ်လကုန်ပိုင်းနှင့် ဧပြီလဆန်းပိုင်းက စစ်ကောင်စီတပ်စခန်းများ၊ ရဲစခန်းနှင့် ထွေအုပ်ရုံးများကို KNUနှင့် သထုံ PDFတို့ ပူးပေါင်း တိုက်ခိုက်မှုများ လုပ်ဆောင်ခဲ့ရာ စစ်ကောင်စီတပ်မှ သေဆုံးထိခိုက်မှုများ ရှိခဲ့သည်။
