▪️အထက်လွှတ်တော်ကလည်း ဆက်လက်အတည် ပြုဖွယ်ရှိပြီး သမ္မတဘိုင်ဒန်လက်မှတ်ထိုးပြီးပါက ဥပဒေ စတင်အသက်ဝင်မည်ဖြစ်
မြန်မာအာဏာသိမ်းစစ်တပ်ကို ပိုမိုထိရောက်စွာအရေးယူနိုင်မည့် BURMA Act ဥပဒေကြမ်းကို အမေရိကန် အောက်လွှတ်တော်က ဧပြီ ၆ ရက်တွင် အတည်ပြုလိုက်ကြောင်း အောက်လွှတ်တော် နိုင်ငံခြားရေးရာကော်မတီဥက္ကဌ ဂျော့မိုက်စ်က ထုတ်ပြန်သည်။
‘Burma Unified Through Rigorous Military Accountability Act of 2021’ အမည်ရ BURMA Act ကို အောက်လွှတ်တော်၏ အတည်ပြုချက်ရရှိပြီးနောက် မကြာမီတွင် အထက်လွှတ်တော်၏ အတည်ပြုချက်ကို ရရှိကာ အမေရိကန်သမ္မတ ဘိုင်ဒန် လက်မှတ်ရေးထိုး အတည်ပြုမည့် ဥပဒေတစ်ရပ်အဖြစ် မြင်တွေ့ရမည်ဟု အမေရိကန်ရောက် မြန်မာ့အရေးလှုပ်ရှားသူများနှင့် လေ့လာသူ အချို့က သုံးသပ်သည်။
“ဒီနေ့အတည်ပြုလိုက်တဲ့ BURMA Act က မြန်မာစစ်တပ်အနေနဲ့ ၂၀၂၁ ဖေဖော်ဝါရီ ၁ ရက်မှာ လူမဆန်စွာ တရားမဝင် အာဏာသိမ်းမှုအတွက် တာဝန်ခံမှုရှိရလိမ့်မယ်ဆိုတဲ့ ရှင်းလင်းတဲ့ သတင်းစကားပါးလိုက်တာပါ။ နောက်ပြီး မြန်မာစစ်တပ်ဟာ လူပေါင်း သန်း တစ်ဝက်နီးပါး ထွက်ပြေးတိမ်းရှောင်စေခဲ့ပြီး အသက်ပေါင်း ၁၇၀၀ ကျော် ဆုံးရှုံးစေခဲ့တဲ့ လူသားမျိုးနွယ်ကို ဆန့်ကျင်တဲ့ရာဇဝတ်မှုတွေ၊ လူ့အခွင့်အရေးရက်စက်ယုတ်မာမှုတွေရဲ့ နောက်ဆက်တွဲကိုလည်း တာဝန်ခံရမှာပါ” ဟု ဂျော့မိုက်စ်က ပြောသည်။
ဆက်လက်ပြီး “သူတို့ရဲ့လွတ်လပ်မှုအတွက် တိုက်ပွဲဝင်နေကြတဲ့ မြန်မာပြည်သူတွေနဲ့အတူ ရပ်တည်ရတဲ့အပေါ် ကျွန်တော် ဂုဏ်ယူပါတယ်” ဟု အမေရိကန်အောက်လွှတ်တော်နိုင်ငံခြားရေးရာကော်မတီဥက္ကဌက ပြောသည်။
အမေရိကန်အောက်လွှတ်တော်က အတည်ပြုခဲ့သော BURMA Act တွင် ၂၀၂၁ ဖေဖော်ဝါရီ ၁ ရက် အာဏာသိမ်းမှုကို ထောက်ခံသည့် လူပုဂ္ဂိုလ်၊ အဖွဲ့အစည်းများကို ပစ်မှတ်ထားဒဏ်ခတ်အရေးယူရေး၊ မြန်မာ့ကျောက်မျက်ရတနာလုပ်ငန်း၊ မြန်မာ့ရေနံနှင့် သဘာဝဓါတ်ငွေ့လုပ်ငန်း (MOGE) ကို ပိတ်ဆို့ရေး၊ မတရားဖမ်းဆီးထိန်းသိမ်းခံ နိုင်ငံရေးအကျဉ်းသားအားလုံး လွတ်မြောက်ရေး၊ မြန်မာ့အရေးဖြေရှင်းရေး အထူးကိုယ်စားလှယ်ခန့်အပ်ရေး အချက်များပါဝင်သည်။
ထို့အပြင် ယင်းဥပဒေ၌ ဒီမိုကရေစီရရှိရေး ကြိုးပမ်းနေသော အင်အားစုများ၊ အရပ်ဘက် ခေါင်းဆောင်များ၊ လွတ်လပ်သည့် သတင်းမီဒီယာအဖွဲ့များ၊ CDM ပါဝင်သူများအတွက် ဒီမိုကရေစီထောက်ပံ့ငွေ ဒေါ်လာ သန်း ၅၀ ကို ၂၀၂၃ မှ ၂၀၂၇ ဘဏ္ဍာနှစ်အထိ ခွင့်ပြုပေးရန် စသည့်အချက်များလည်း ပါဝင်သည်။