ဧရာဝတီတိုင်း ဟင်္သာတမြို့လယ်တွင် စစ်ကောင်စီက ဆောက်လုပ်နေသည့်သင်္ကြန်မဏ္ဍပ်၌ မိုင်းပေါက်ကွဲခဲ့ပြီး မဏ္ဍပ်အနီးရှိ အနှေးယာဥ်လုပ်သားအချို့ကို စစ်ကောင်စီက ဖမ်းဆီးသွားသည်ဟု မြို့ခံများက ပြောသည်။
“အသံမိုင်းလို့ပြောတယ်။ မနက် ၅နာရီက ကွဲတာ။ လူတော့ မထိဘူး။အနားက ဆိုက်ကားဆရာတွေတော့ ဖမ်းသွားတယ်”ဟု ပေါက်ကွဲမှုဖြစ်ရာအနီးရှိ ပြည်သူတစ်ဦးက ဖုန်းဖြင့် ဆက်သွယ်ပြောသည်။
စစ်ကောင်စီသည် ဟင်္သာတမြို့ပတ်အဝိုင်းအနီး အချက်အချာကျသည့်နေရာတွင် ဗဟိုမဏ္ဍပ်ဆောက်လုပ်ပြီး သင်္ကြန်ပွဲကျင်းပရန် စီစဥ်ထားသည်။ စစ်ကောင်စီ၏ အတုအယောင် သင်္ကြန်တွင် ပူးပေါင်းပါဝင်သူများကို တိုက်ခိုက်သွားမည်ဟု ဧရာဝတီတိုင်း တော်လှန်ရေးအင်အားစုက သတိပေးထုတ်ပြန်ထားသည်။
စစ်ကောင်စီ၏သင်္ကြန်ပွဲကို သပိတ်မှောက်သွားမည်ဟု မြို့ခံအများစုက ဆိုသည်။