●လက်နက်ခဲယမ်းများသိမ်းဆည်းရမိဟု လူထုတော်လှန်ရေးမဟာမိတ်အဖွဲ့ပြော
မကွေးတိုင်း၊ငဖဲ နှင့် စေတုတ္တရာမြို့နယ် အနောက်ဘက်ရှိ ရခိုင်ရိုးမတောင်ကြောတွင်အကြမ်း ဖက်စစ်ကောင်စီတပ်နှင့်တိုက်ပွဲ သုံးကြိမ်ဖြစ်ပွားခဲ့ရာ စစ်ကောင်စီတပ်မှ အရာရှိ အပါ အဝင် သေဆုံးသူ ၂၀ ကျော်နှင့် ဒဏ်ရာရရှိသူ ၃၀ ကျော်ရှိခဲ့ကြောင်း People’s Revolution Alliance လူထုတော်လှန်ရေးမဟာမိတ် က ယနေ့ (ဧပြီ ၁၉ ရက်)ထုတ်ပြန်သည်။
တိုက်ပွဲ ဖြစ်စဥ်များမှာ ဧပြီ ၈ ရက်မှ ၁၄ ရက်အတွင်း အကြမ်းဖက်စစ်ကောင်စီ၏ ထိုးစစ်ကိုလူထုတော်လှန်ရေးမဟာမိတ်နှင့် Asho Chin Defence Force-ACDF တို့ ပူးပေါင်းခုခံခဲ့သည်ဟု ဆိုသည်။
“အကြမ်းဖက်စစ်ကောင်စီတပ်က လက်နက်ကြီးပစ်ကူနှင့် လေကြောင်းပစ်ကူများရယူကာ စခန်းသိမ်းကျားထိုးတက်လာခဲ့ကြပေမယ့် ကျွနုပ်တို့ပူးပေါင်းတပ်မှ နယ်မြေကျွမ်းကျင်မှုအသာစီးယူပြီး ပြောက်ကျားတိုက်ခိုက်ခဲ့တာကြောင့် အကြမ်း ဖက်စစ်ကောင်စီတပ်က အကျအဆုံးများစွာနဲ့ နောက်ဆုတ်သွားခဲ့ပါသည်”ဟု People’s Revolution Alliance က အသိပေးသည်။
Public Service Announcement
အတွင်းသတင်းများအရ အကြမ်းဖက်စစ်ကောင်စီတပ်မှ အရာရှိတစ်ဦးနှင့် အခြားအဆင့် တစ်ဦးသည် မိမိကိုယ်ကိုယ် အဆုံးစီရင်မှုဖြစ်ပွားခဲ့ပြီး အရာရှိနှစ်ဦးလည်း လက်နက်နှင့်တကွ ပျောက်ဆုံးနေကြောင်း ထုတ်ပြန်ချက်၌ ဖော်ပြသည်။
တိုက်ပွဲအတွင်း အကြမ်းဖက်စစ်တပ်ထံမှလက်နက်နှင့် ကျည်အမြောက်အများသိမ်းဆည်းရမိခဲ့သည်ဟုလည်းပါရှိသည်။
လူထုတော်လှန်ရေးမဟာမိတ်နှင့် Asho Chin Defence Force-ACDF ပူးပေါင်းတပ်မှလည်း ရဲဘော်သုံးဦး လက်နက်ကြီးထိမှန်ခဲ့သော်လည်း အသက်အန္တရာယ်မစိုးရိမ်ရကြောင်းလည်းသိရသည်။
