မတူပီတွင်တိုက်ပွဲ နှစ်ကြိမ်ဖြစ်ပြီးစစ်​ကောင်စီတပ် ၅ဦး​သေ

မတူပီ မြို့နယ်အတွင်း ယနေ့ (ဧပြီ ၂၂ ရက်)တွင် အကြမ်းဖက်စစ်ကောင်စီတပ်နှင့် နှစ်ကြိမ်တိုက်ပွဲဖြစ်ပွားခဲ့ပြီး အကြမ်းဖက်စစ်ကောင်စီဘက်မှ ၅ ဦးထက်မနည်းသေဆုံးခဲ့ကြောင်း CDF(မတူပီ)က သတင်းထုတ်ပြန်သည်။

ပထမအကြိမ်တိုက်ပွဲသည် မတူပီ-တင်လောင်းလမ်းပိုင်းရှိ မတူပီမြို့မှ ၂မိုင်အကွာတွင် ဖြစ်ပွားခဲ့ပြီး ဒုတိယအကြိမ်တိုက်ပွဲမှာ မတူပီမြို့ ၁၃ မိုင်အကွာရှိ တွီရှစ်ကျေးရွာနှင့် ဝလံပီကျေးရွာ ကြားတွင်ဖြစ်ပွားခဲ့ခြင်းဖြစ်သည်။ ပထမအကြိမ်တိုက်ပွဲကို ယနေ့နေ့လယ် ၂နာရီခန့်တွင်ဖြစ်ပွားခဲ့ပြီး ထိုတိုက်ပွဲတွင် အကြမ်းဖက်စစ်ကောင်စီတပ်သား​သေဆုံးထိခိုက်မှု အ​ခြေအ​နေကို အတည်မပြုနိုင်ခဲ့ဟုထုတ်ပြန်ချက်တွင်​ဖော်ပြထားသည်။

ဒုတိယအကြိမ်တိုက်ပွဲသည် ယနေ့ နေ့လယ် ၂ နာရီခွဲတွင် ဖြစ်ပွားပြီး အကြမ်းဖက်စစ်ကောင်စီတပ်သား ၅ ဦးသေဆုံးခဲ့သည်ဟုထုတ်ပြန်သည်။ ထိုတိုက်ပွဲနှစ်ခုလုံးတွင် CDF(မတူပီ) ဘက်မှ အထိအခိုက် အကျအဆုံးမရှိဟုလည်းပါရှိသည်။

ထိုပြင် ဧပြီ ၂၁ ရက်တွင်လည်း မတူပီ-ပလက်ဝ လမ်းပေါ်ရှိ ထယ်ဘွေးစစ်​ကောင်စီတပ်စခန်းကို အင်အားလာဖြည့်ပြီး ပြန်လာ​သောစစ်ကောင်စီတပ်ကို ခြုံခိုတိုက်ခိုက်ရာစစ်ကောင်စီတပ်သား ၆ ဦးသေဆုံးခဲ့သည်ဟု CDF( မတူပီ)မှ ထုတ်ပြန်ထားသည်။

Public Service Announcement

အဆိုပါစစ်ကြောင်းသည် အင်အား ၁၅၀ခန့်ပါဝင်ပြီး မတူပီမြို့ နှင့် ၁၆ မိုင်အကွာ ဝလန်ပီးရွာအနီးတွင်CDF မတူပီက မိုင်းဆွဲတိုက်ခိုက်ခဲ့ပြီး ၊ ခြုံခိုတိုက်ခိုက်ခဲ့ရ စစ်ကောင်စီတပ်မှ ၆ဦး ​သေဆုံးကာ ဒဏ်ရာရရှိသူ အနည်းဆုံး ၇ဦးခန့်လည်းရှိ​ကြောင်းCDF(မတူပီ) တာဝန်ရှိသူတစ်ဦးကပြောထားသည်။