▪️လမ်းဘေးရှိ ကျေးရွာအချို့ကို စစ်ကောင်စီတပ် မီးရှို့ဖျက်ဆီးနေ
စစ်ကိုင်းတိုင်း ကောလင်း-ဝန်းသိုကားလမ်းတွင် စစ်ကောင်စီစစ်ကြောင်း မိုင်းဆွဲခံရပြီး ၂၃ဦးသေဆုံးကာ အများအပြားဒဏ်ရာရပြီးနောက် လမ်းဘေးကျေးရွာအချို့ကို စစ်ကောင်စီက မီးရှို့ဖျက်ဆီးနေသည်။
စစ်ကောင်စီတပ်သား အင်းအား ၅၀ခန့်ပါသည့် စစ် ကြောင်းသည် ကောလင်းမြို့မှ ဝန်းသိုမြို့ဘက်သို့ ဧပြီ ၂၃ရက်က ခြေလျင်စစ်ကြောင်းထိုးလာစဥ် ပြည်သူ့ကာကွယ်ရေးမဟာမိတ်အဖွဲ့က မိုင်းခွဲတိုက်ခိုက်ခြင်းဖြစ်သည်။ စစ်ကောင်စီဘက်က ၂၃ဦး သေဆုံးကာ ၁၄ဦးဒဏ်ရာရသွားကြောင်း ပြည်သူ့ကာကွယ်ရေးမဟာမိတ်အဖွဲ့၏ သတင်းထုတ်ပြန်ရေး စာမျက်နှာ Kawlin Revolution-KRက People’s Spring အား အတည်ပြုချက်ပေးသည်။
အထိနာသွားသည့် စစ်ကောင်စီတပ်ဖွဲ့က ယနေ့ (ဧပြီ၂၄)နံနက်ကစတင်ကာ ကောလင်း-ဝန်းသိုကားလမ်းဘေးရှိကျေးရွာအချို့ကိုမီးရှို့ဖျက်ဆီးနေသည်ဟု ပြည်သူ့ကာကွယ်ရေးရဲဘော်တစ်ဦးက ပြော သည်။
Public Service Announcement
“၀န်းသိုမြို့နယ် ရှမ်းစု၊သိမ်လည်၊အုပ်ရှက်ကုန်းကျေးရွာ၊ ရွာလေးရွာ ခန့် မီးရှို့ခံနေရ။ ယခုမီးခိုးများ လှိုင်လှိုင်ထွက်နေ။သိမ်လည်ရွာမှ အမျိုးသမီးကြီးတစ်ဦး မီးထဲပါသွားကြောင်းသိရှိရ”ဟု Kawlin Revolution-KRက ထုတ်ပြန်ထားသည်။
ဒေသခံအရပ်သားများသည် ဘေးလွတ်ရာသို့ ထွက်ပြေးနေရပြီး အခြားဒေသမှ ပြည်သူ့ကာကွယ် ရေးတပ်ဖွဲ့များ တပြိုင်နက်တိုက်ပွဲဖော်ပေးကြရန် မြို့ခံတစ်ဦးက အကူအညီတောင်းသည်။
