ထားဝယ်မြို့နယ်၊ ပကာရီကျေးရွာတွင်း အကြမ်းဖက်စစ်ကောင်စီတပ်နှင့်ဒေသခံကာကွယ်ရေးတပ်တို့ကြား ယနေ့ည ၁၀နာရီခန့်က တိုက်ပွဲဖြစ်ပွားနေကြောင်း ဒေသခံများကပြောသည်။
ထားဝယ်-ထီးခီးလမ်းပိုင်းရှိ ပကာရီရွာ၊ရဲစခန်းကို ဒေသခံကာကွယ်ရေးတပ်များက တိုက်ခိုက်သိမ်းယူဖျက်ဆီးခဲ့ပြီးနောက် အကြမ်းဖက်စစ်တပ်က ထိုးစစ်ပြန်ဆင်လာနေခြင်းဖြစ်သည်ဟု ဒေသခံများထံမှသိရသည်။
“ည ၁၀နာရီလောက်ကတည်းက ရွာထဲကို လက်နက်ကြီးနဲ့ပစ်နေတာ ၈ချက်လောက်ရှိတယ်။ ၁၁ နာရီလောက်ကလည်းပစ်နေသေးတယ်”ဟု ပကာရီရွာသားတစ်ဦးကပြောသည်။
ည ၁၀ နာရီမှ ၁၁ နာရီအထိ လက်နက်ကြီး၊ လက်နက်ငယ်များနှင့် ဆက်တိုက်ပစ်ခတ်နေသည်ဟုလည်း အခြားဒေသခံတစ်ဦးကပြောသည်။
Public Service Announcement
“ပကာရီဘက်မှာ အုန်းဒိုင်းကျဲ ချနေကြပြီ လက်နက်ကြီးတွေ အသံက အဝေးကြီးက ကြားနေရတယ်”ဟု ဒေသခံတစ်ဦးကပြောသည်။
ဧပြီ ၂၄ ရက်က တနင်္သာရီတိုင်း၏ မြို့တော် ထားဝယ်မြို့နှင့် ဆယ်မိုင်သာ ကွာဝေးသည် ပကာရီရဲစခန်းကို ဒေသခံကာကွယ်ရေးတပ်များက ဝင်ရောက်စီးနင်းတိုက်ခိုက်ဖျက်ဆီးပြီး နယ်မြေကိုထိန်းချုပ်ထားသည်။ ပကာရီရွာကို KNDO၊ ထားဝယ်ပြည်သူ့ကာကွယ်ရေးတပ် (PDF) နှင့် လောင်းလုံးမြို့နယ်ပြည်သူ့ကာကွယ်ရေးအဖွဲ့ (ပကဖ) တို့ ပူးပေါင်းကာ စီးနင်းခဲ့ခြင်း ဖြစ်သည်။
ပကာရီရွာကို စစ်ကြောင်းထိုးရန် အကြမ်းဖက်စစ်ကောင်စီတပ်က အင်အား ၆၀ ခန့်ဖြင့် ပကာရီရွာအနီးရှိ သဗျာရွာအနားရှိ ရော်ဘာစက်ရုံကို ခြေကုတ်ယူထားသည်ဟု ဒေသခံများထံမှသိရသည်။
အကြမ်းဖက်စစ်ကောင်စီတပ်က လက်နက်ကြီးများဖြင့် ပကာရီရွာဘက်ကို ပစ်ခတ်ရန် စီစဉ်နေစဉ် ပြည်သူ့ကာကွယ်ရေးတပ်များက လက်နက်ကြီးများဖြင့်ပြန်လည် ပစ်ခတ်ခဲ့သည်။
ထိုပစ်ခတ်မူကို အကြမ်းဖက်စစ်ကောင်စီတပ်ဘက် ပြန်လည်မခုခံနိုင်ခဲ့ကြောင်းနှင့် အရေးပေါ်ကားများ အမြောက်အများရောက်သဖြင့် အကြမ်းဖက်စစ်ကောင်စီတပ်မှ အရာရှိနှင့် စစ်သားများ ထိခိုက်မူများရှိသည်ဟု ဒေသခံကာကွယ်ရေးတပ်နှင့်နီးစပ်သူများကပြောသည်။
