ဗိုလ်မှူးချုပ်ကံမြင့်သန်း(ကာကွယ်ရေးပစ္စည်းထုတ်လုပ်ရေးအရာရှိချုပ်ရုံး) ခရီးစဥ်အကြိုထောက်လာသော စစ်ယာဥ်တန်းအား ကြားဖြတ်တိုက်ခိုက်ရာ ကားနှစ်စီးပျက်စီး၍ သေဆုံးသူ အရေ အတွက်စိစစ်ဆဲဖြစ်ကြောင်း လူထုတော်လှန်ရေးမဟာမိတ်(PRA)က ထုတ်ပြန်သည်။
အကြမ်းဖက်စစ်ကောင်စီယာဥ်တန်းကို စေတုတ္တရာမြို့နယ်၊ မဏ္ဍပ်ကိုင်ကျေးရွာအနီး ငဖဲ-စေတုတ္တရာလမ်းမပေါ်၌ PRA နှင့် Sidoktaya PDFတို့က ယနေ့(ဧပြီ ၂၇ ရက်) နေ့လယ် ၁၂ နာရီခွဲခန့်တွင် ပူးပေါင်း၍ မိုင်းဆွဲခဲ့သည်ဟု ဆိုသည်။
ဗိုလ်မှူးချုပ်ကံမြင့်သန်းခရီးစဥ်ကို အကြိုထောက်ရန်လာသော မိုင်းဆွဲခံရသည့် ယာဥ်တန်းမှာ ကာကွယ်ရေးပစ္စည်းစက်ရုံ စေတုတ္တရာ(ကပစ- ၂၀ )မှ ဖြစ်ကြောင်း PRA က အသိပေးသည်။
ကြားဖြတ်တိုက်ခိုက်မှုကြောင့် အကြမ်းဖက်စစ်ကောင်စီမှ ကားနှစ်စီးပျက်စီးကာ သေဆုံးသူ အရေအတွက် စိစစ်နေဆဲဖြစ်ပြီး စစ်ကောင်စီတပ်သားလေးဦးမှာ အပြင်းအထန် ဒဏ်ရာရရှိခဲ့ကြောင်း ထုတ်ပြန်ချက်၌ ဖော်ပြသည်။
Public Service Announcement
ထို့အပြင် ပြည်သူ့ကာကွယ်ရေး တော်လှန်ရေးရဲဘော်များ မှ ဘေးကင်းစွာဆုတ်ခွာနိုင်ခဲ့ကြောင်း သိရသည်။
ဧပြီဒုတိယပတ်က ငဖဲမြို့နယ်နှင့် စေတုတ္တရာမြို့ အနောက်ဘက်ရှိ အနောက်ရိုးမတောင်ကြောတွင် စစ်ကောင်စီတပ်ကို PRA နှင့် Asho Chin တပ်ဖွဲ့တို့ပူးပေါင်းတိုက်ခိုက်မှုမှ စစ်ကောင်စီတပ်သား ၂၀ ကျော်သေဆုံးခဲ့သည့် အပြင် လက်နက်ခဲယမ်းများပါရရှိခဲ့သည်။
