▪️ဖောင်းပြင် PDFမှ ရဲဘော်နှစ်ဦးကျဆုံးခဲ့ရ
စစ်ကိုင်းတိုင်း ဖောင်းပြင်မြို့နယ်တွင် အကြမ်းဖက်စစ်ကောင်စီနှင့် ရှမ်းနီတပ်ဖွဲ့ ပူးပေါင်း၍ အရပ်သားနေအိမ်များအား မီးရှို့ဖျက်ဆီးနေပြီး ယခုရက်ပိုင်းတိုက်ပွဲများအတွင်း စစ်ကောင်စီဘက်က ၁၅ဦးသေဆုံးကာ ပြည်သူ့ကာကွယ်ရေးတပ်မှ ရဲဘော်နှစ်ဦး ကျဆုံးခဲ့သည်ဟု ဖောင်းပြင် PDFက သတင်းထုတ်ပြန်သည်။
အကြမ်းဖက်စစ်ကောင်စီ အင်အား ၁၅၀ခန့်သည် ဧပြီ ၂၆ရက်ကစတင်ကာ ဖောင်းပြင်ဒေသကို စစ်ကြောင်းထိုးလာပြီး ဧပြီ ၂၈ရက်တွင် တိုက်ပွဲဖြစ်ပွာခဲ့ခြင်း ဖြစ်သည်။
” စစ်ကောင်စီက နေရာသုံးလေးနေရာကို တစ်ပြိုင်နက် ထိုးစစ်ဆင်လာတာပါ။လက်နက်ရော လူအင်အားပါ မမျှပေမယ့် ကျွန်တော်တို့ ခုခံတိုက်ခိုက်ခဲ့ကြတယ်”ဟု ပြည်သူ့ကာကွယ်ရေးတပ်မှ ရဲဘော်တစ်ဦးက ပြောသည်။
Public Service Announcement
စစ်ကောင်စီတပ်သည် နောင်စကန်နှင့်ရွှေထီးကုန်းကျေးရွာဖက်တွင် ကလေးငယ်အချို့ကို လူသားတံတိုင်းပြုလုပ်၍ အရပ်ဝတ်ဖြင့် ချီတက်လာခဲ့ကြသည်ဟုလည်း ဖောင်းပြင်မြို့နယ်ပြည်သူ့ကာကွယ်ရေးတပ်ဖွဲ့ – ဖောင်းပြင်(PDF)က သတင်းထုတ်ပြန်ထားသည်။
ဧပြီ ၂၈ရက် နံနက် ၆ နာရီခန့်က တိုက်ပွဲတွင် စစ်ကောင်စီဘက်မှ ၁၅ဦးသေဆုံးခဲ့ကြောင်း၊ ပြည်သူ့ကာကွယ်ရေးတပ်မှ ရဲဘော်နှစ်ဦးကျဆုံးကာ နှစ်ဦးဒဏ်ရာရခဲ့ကြောင်း သတင်းထုတ်ပြန်သည်။
” ကျဆုံး နှစ်ယောက် ဒဏ်ရာရနှစ်ယောက်။ တစ်ယောက်ကတော့ မိုင်းမတော်တဆ ပါ။နှစ်ယောက်စလုံး အသက်အန္တရယ်မစိုးရိမ်ရပါ”ဟု ဖောင်းပြင် PDFက ဆိုသည်။
ထို့အပြင် ဟာပါကျေးရွာမှ အရပ်သားနှစ်ဦး၏နေအိမ်ကို အကြမ်းဖက်စစ်ကောင်စီတပ်က မီးရှို့သွားခဲ့သည်ဟုလည်း ဒေသခံအချို့က ပြောသည်။
သို့သော် လတ်တလောဖြစ်နေသည့် ဖောင်းပြင်ဒေသ တိုက်ပွဲတွင် အကြမ်းဖက်စစ်ကောင်စီနှင့်အတူ ရှမ်းနီအဖွဲ့ ကပူးပေါင်း၍ တိုက်ခိုက်ပေးနေသည်ဟု ဖောင်းပြင် PDF က လူထုအားအသိပေးထားသည်။
“ဒီတိုက်ပွဲမှာ အကြမ်းဖက် စစ်ကောင်စီနဲ့အတူ ရှမ်းနီအမျိုးသားတပ်မတော်(SNA)က စိုင်းပြူးရဲ့တပ်ပါတယ်လို့သိရပါတယ်။အင်အားဘယ်လောက်ပါဝင်တယ်လို့တော့မသိရပါ”ဟု သတင်းထုတ်ပြန်ထားသည်။
ဟုမ္မလင်းမြို့နယ်တွင်အခြေစိုက်သည့် ရှမ်းနီအမျိုးသားများတပ်မတော် (Shanni Nationalities Army- SNA)ဟု ဒေသခံများက သိရှိထားသည့် ရှမ်းနီလက်နက်ကိုင်အဖွဲ့အား အမျိုးသားညီညွတ်ရေးအစိုးရအုပ်ချုပ်မှုနယ်မြေတွင် အခွန်ငွေအကြောင်းပြ၍ ဆက် ကြေးလာမကောက်ရန် ဖောင်းပြင် PDFက ဧပြီ ၂၆ရက်တွင် သတိပေးထားခဲ့သည်။
SNAသည် စစ်ကိုင်းတိုင်းအတွင်း စစ်အာအာရှင်တော်လှန်တိုက်ခိုက်နေသည့် ပြည်သူ့ကာကွယ်ရေးတပ်များအား KIAက ပူးပေါင်းကူညီပေးနေခြင်းအပေါ် အမြင်မကြည်ဘဲ ယခုအခါ စစ်ကောင်စီနှင့် ပူးပေါင်းကာ လူထုကို တိုက်ခိုက်နေသည်ဟု ဒေသခံများက ပြောသည်။
