ယနေ့တိုက်ပွဲတွင် စစ်ကောင်စီတပ် ငါးဦးသေဆုံးပြီး ဒဏ်ရာရသူများဟုပြော
ချင်းပြည်နယ် မင်းတပ် – မတူပီလမ်းပိုင်းတွင် စစ်ကောင်စီတပ်ကို ယနေ့ ဆက်လက်တိုက်ခိုက်ခဲ့ကြောင်း မင်းတပ် ချင်းကာကွယ်ရေးတပ်(CDF)ပြောရေးဆိုခွင့်ရှိသူ ဆလိုင်းဟာအွမ်က ပြောသည်။
မတူပီမှ မင်းတပ်မြို့သို့လာသည့် စစ်ကောင်စီတပ်ယာဉ်တန်းနှင့် ရှေ့ပြေးစစ်ကြောင်းကို မင်းတပ် CDFက ဧပြီ ၃၀ရက်မှစတင်တိုက်ခိုက်နေပြီး နေ့စဉ် တိုက်ပွဲပြင်းထန်ခဲ့သည်။
“ဒီနေ့ စကစဘက်က ငါးယောက်သေတယ်။ မိုင်တိုင်ဘယ်လောက်မှာ ဖြစ်တယ်ဆိုတာတော့ အခြေအနေအရ မကြေညာတော့ဘူး။ စကစဘက်ကနေ ငါးယောက်လောက်သေတယ် ဒဏ်ရာအများအပြားရတယ်။ ကျွန်တော့်ဆီကို သတင်းလှမ်းပို့တာတော့ သူတို့နောက်ကနေ လိုက်ပစ်တာလို့ ပြောတယ်” ဟု ဆလိုင်းဟာအွမ်က ပြောသည်။
Public Service Announcement
ယခင်နေ့များကလည်း မင်းတပ် CDF တိုက်ခိုက်၍ စစ်ကောင်စီတပ်မှ သေဆုံးထိခိုက်မှုများရှိခဲ့သည်။
မတူပီသို့ အင်အားပို့ပြီး ပြန်လာသည့် စစ်ကောင်စီတပ်ယာဉ်တန်းသည် ဧပြီ ၂၇ရက်မှစ၍ မတူပီ မြို့မှ ထွက်ခွာလာရာ မြို့အထွက်၌ပင် မတူပီ CDFက တိုက်ခိုက်မှုများ လုပ်ဆောင်ခဲ့သည်။ အဆိုပါ စစ်ကောင်စီယာဉ်တန်း မင်းတပ်မြို့နယ်သို့ ဝင်လာရာတွင်လည်း မင်းတပ် CDFက ကြားဖြတ်တိုက်ခိုက်မှုများ လုပ်ဆောင်လျက်ရှိသည်။
