ကရင်အမျိုးသားအစည်းအရုံး(KNU) ဘီးလင်းမြို့နယ် ဝင်းတာပန်နှင့် လေးကေဒေသရှိ စစ်ကောင်စီတပ်စခန်းများသို့ စစ်ကူပို့ရန်ပြင်ဆင်နေသည့် စစ်ကောင်စီတပ်နှင့်၎င်း၏ လက်အောက်ခံနယ်ခြားစောင့်တပ်(BGF)တို့သည် ဒေသခံများကို ဖမ်းဆီးပြီး လူသားဒိုင်းအဖြစ် အသုံးပြုရန်စီစဉ်နေကြောင်း KNU တပ်မဟာ(၁)နယ်မြေ သထုံခရိုင်ဥက္ကဋ္ဌပဒိုစောစိုးမြင့်က ပြောသည်။
“ဒေသတွင်းမှာ ကျွန်တော်တို့ကြားတာက ဗိုလ်တင်ဝင်းတို့အဖွဲ့နဲ့ စကစတွေ ပူးပေါင်းပြီးတော့ စစ်ကြောင်းချီလာတယ်လို့ကြားတယ်။ ရွာသားအယောက် ၁၀၀ကျော် ဖမ်းထားပြီး လူသားဒိုင်းအဖြစ်အသုံးပြုဖို့ ပေါ်တာဆွဲနေတာပေါ့”ဟု ၎င်းက ဆိုသည်။
ဘားအံမြို့နယ်အတွင်းရှိ ကျေးရွာများမှ ပြည်သူလူထုများကို ဖမ်းဆီးနေခြင်းဖြစ်ပြီး အဆိုပါ စစ်ကောင်စီနှင့် BGF တပ်တို့သည် လေးကေ၊ ဝင်းတာပန်ဘက်သို့ စစ်ကူလာမည်ဟု သတင်းရထားကြောင်း၊ တိုက်ပွဲများပိုမိုဖြစ်ပွားလာနိုင်ကြောင်း ပဒိုစောစိုးမြင့်က ပြောသည်။
အဆိုပါ လေးကေနှင့် ဝင်းတာပန် စစ်ကောင်စီတပ်စခန်းများ ဧပြီ ၂၃ရက် နောက်ဆုံးထားပြီး နယ်မြေအတွင်းမှ ဆုတ်ခွာပေးရန် KNU တပ်မဟာ(၁)နယ်မြေရှိ ကရင်အမျိုးသားကာကွယ်ရေးတပ်(KNDO) တပ်ရင်း(၁)က ကြေညာချက်ထုတ်ပြန်ထားသည်။ သို့ရာတွင် စစ်ကောင်စီတပ်စခန်းများ ဆုတ်ခွာခြင်းမရှိ၍ သတိပေးပစ်ခတ်တိုက်ခိုက်မှုများ လုပ်ဆောင်ခဲ့ရာ အဆိုပါဒေသ၌ တိုက်ပွဲများ မကြာခဏ ဖြစ်ပွားနေသည်ဟုဆိုသည်။
စစ်ကောင်စီတပ်ကလည်း လေးကေရွာကို လေယာဉ်ဖြင့် လာရောက် ပစ်ခတ်တိုက်ခိုက်မှုများ လုပ်ဆောင်ခဲ့၍ လူနေအိမ်များထိခိုက်ပျက်စီးမှုရှိခဲ့သည်။ ထို့ပြင် စစ်ကောင်စီတပ်များက လက်နက်ကြီးများဖြင့်ပစ်ခတ်ခဲ့၍ ဘီးလင်းမြို့နယ်ရှိဒေသခံ ၇,၀၀၀ခန့် နေအိမ်စွန့်ခွာ ထွက်ပြေးတိမ်းရှောင်နေကြရကြောင်း KNUက ထုတ်ပြန်ထားသည်။