▪️ပူးပေါင်းတပ်ဖွဲ့ကလက်နက် လေးလက်၊ ဒရုန်းတစ်စီး၊ ခဲယမ်းနှင့်စစ်ဘက်သုံးပစ္စည်းများသိမ်းဆည်းရရှိ
စစ်ကိုင်းတိုင်း ကလေးမြို့နယ်တောင်ပိုင်း ရှားဖိုကျေးရွာသို့ စစ်ကြောင်းထိုးလာသည့် စစ်ကောင်စီတပ်များကို ဒေသတွင်းရှိ ကာကွယ်ရေးတပ်ဖွဲ့များ ပူးပေါင်းတိုက်ခိုက်ခဲ့ရာ စစ်ကောင်စီဘက်မှ အနည်းဆုံး ၂၀ ဦး သေဆုံးပြီး ဒဏ်ရာရသူအများအပြားရှိခဲ့ကာ သေနက် ၄လက်နှင့် ခဲ့ယမ်းများရရှိခဲ့သည်ဟုကလေး PDFက ယနေ့သတင်းထုတ်ပြန်သည်။
မေလ ၂ရက် နံနက်မှစ၍ ရှားဖိုကျေးရွာသို့ ခြေလျင်ဖြင့်စစ်ကြောင်းထိုးလာသည့် အင်အားရာဂဏန်းရှိ အကြမ်းဖက်စစ်ကောင်စီတပ်များနှင့် ၎င်းတို့၏ လက်ပါးစေ ပျူစောထီးအဖွဲ့များကို PDF-ကလေး၊ CNDF၊ CDF- KKG၊ RKDF Zomi PDF နှင့် ပကဖ ပူးပေါင်းတပ်ဖွဲ့တို့က တိုက်ခိုက်ခဲ့ရာ နှစ်ရက်ဆက် တိုက်ပွဲအပြင်းအထန်ဖြစ်ခဲ့သည်။ စစ်ကောင်စီတပ်ကအထိနာသဖြင့် တိုက်ခိုက်ရေးရဟတ်ယာဥ် ၂ စီးဖြင့် ယမန်နေ့ညနေက တိုက်ခိုက်ခဲ့သည်။
တိုက်ပွဲတွင် စစ်ကောင်စီတပ်သားအနည်းဆုံး ၂၀ ဦး သေဆုံးပြီး ၊ဒဏ်ရာရသူအများအပြားရှိခဲ့သည်ဟုဆိုသည်။ထိုအပြင်ယမန်နေ့ နေလယ်ပိုင်းက အောင်မဂ်လာရွာမှ ရှားဖိုရွာသို့ ချဥ်းကပ်လာသောစစ်ကောင်စီတပ်များကိုကလေး PDFကမိုင်းဆွဲတိုက်ခိုက်မှုကြောင့် သေဆုံးထိ့ခိုက်သူတိုးလာနိုင်သေးကြောင်းလည်းဖော်ပြထားသည်။ ပူးပေါင်းတပ်ဖွဲွများဘက်မှ တစ်ဦးဒဏ်ရာရရှိပြီ မစိုးရိမ်ရဟုသိ့ရသည်။ သို့သော် အကြမ်းဖက်စစ်ကောင်စီတပ်မှ လက်နက်ကြီးဖြင့်ရမ်းသမ်းပစ်ခတ်၍ ရှားဖိုရွာမှ အမျိုးသား ၂ ဦး ၊အမျိုးသမီး ၁ ဦးဒဏ်ရာရရှိခဲ့သည်။
Public Service Announcement
ပူးပေါင်းတပ်ဖွဲ့မှ နယ်မြေရှင်းလင်းစဉ် စစ်ကောင်စီတပ်မှ အလောင်း ၄လောင်းနှင့်အတူ MA1 မောင်းပြန်သေနတ် ၂လက်၊ MA2 စက်ကလေး ၂လက် ရရှိခဲ့ပြီး စစ်ကောင်စီတပ်ဘက်မှ လွှတ်တင်သော ဗုံး ၃လုံးပါဝင်သည့် တိုက်ခိုက်ရေးဒရုန်း ၁စင်းကို ပစ်ခတ်နိုင်ခဲ့ကြောင်း ရရှိခဲ့သည့် ဒရုန်းနှင့် လက်နက်ခဲယမ်းများ၏ ဓာတ်ပုံများနှင့်အတူထုတ်ပြန် ထားသည်။
“ရှားဖိုတိုက်ပွဲက မနေ့(မေ ၂)မနက်ကနေ စပြီး မနားတမ်းပစ်ခတ်ခဲ့တယ်။သတင်းကောင်းတစ်ခုက စစ်ကောင်စီတပ်လွှတ်လိုက်တဲ့ ဗုံးသီးပါတဲ့ ဒရုန်းတစ်စင်းကို ပစ်ချနိုင်တာနဲ့ မနေ့ညကနေ ဒီနေ့(မေ၃)အထိ ကိုယ့်ဖက်က ထိခိုက်ဒဏ်ရာရတာမရှိသေးဘူး”ဟု CDF- KKG တပ်ဖွဲ့ဝင်တစ်ဦးကPeople’s Spring သို့ မေ ၃ ရက် ညတွင်ပြောသည်။
ယမန်နေ့တိုက်ပွဲတွင် ပူးပေါင်းတပ်ဖွဲ့မှ အကျအဆုံးမရှိဘဲ ဆုတ်ခွာနိုင်ခဲ့ပြီးနောက် ညနေ ၅နာရီခန့်တွင် စစ်ကောင်စီနှင့် ပျူစောထီးများ ရှားဖိုရွာအတွင်းသို့ဝင်ရောက်ကာ လူနေအိမ်များကို မီးရှို့ဖျက်ဆီးနေကြောင်းဒေသခံများကပြောသည်။
စစ်ကောင်စီတပ်က ကလေးမြို့နယ်တောင်ပိုင်းရှိကျေးရွာများသို့ ထိုးစစ်ဆင်ပြီး စစ်ရာဇဝတ်မှုများကျူးလွန်နေသဖြင့်ဒေသခံထောင်နှင့်ချီ၍ စစ်ဘေးရှောင်နေကြရသည်ဟုလည်း အသိပေးထားသည်။
