မတူပီမှ မင်းတပ်မြို့သို့ ပြန်လာသည့် စစ်ကောင်စီတပ်ယာဉ်တန်းကို ယနေ့ဆက်လက်တိုက်ခိုက်ခဲ့ရာ စစ်ကောင်စီတပ်မှ ငါးဦးသေဆုံးပြီး အများအပြားဒဏ်ရာရခဲ့ကြောင်း မင်းတပ် ချင်းကာကွယ် ရေးတပ်(CDF)က ယနေ့ ထုတ်ပြန်သည်။
စစ်ကောင်စီတပ်ယာဉ်တန်းကို ယနေ့(မေ ၄ရက်) နံနက်စော ၃နာရီခွဲတွင် တိုက်ခိုက်ခဲ့ရာ ၂နာရီကြာ တိုက်ပွဲဖြစ်ခဲ့ကြောင်း ဖော်ပြထားသည်။
တိုက်ပွဲတွင် မင်းတပ် CDFတပ်ဖွဲ့ဝင်များ လုံခြုံဘေးကင်းစွာ ပြန်လည်ဆုတ်ခွာနိုင်ခဲ့သည်ဟု ဆိုသည်။
စစ်ကောင်စီတပ်ယာဉ်တန်းသည် ယနေ့ညပိုင်း၌ မူတပီ – မင်းတပ်လမ်း မိုင်တိုင်(၄၅)တွင် ညအိပ်နိုင်ကြောင်း ခန့်မှန်းထားပြီး မနက်ဖြန် မေလ ၅ရက်တွင် တိုက်ပွဲပိုမိုပြင်းထန်လာနိုင်သည်ဟု မင်းတပ် CDFက ထုတ်ပြန်ထားသည်။
ယနေ့တိုက်ပွဲတွင် စစ်ကောင်စီတပ်မှ ငါးဦး ထပ်မံသေဆုံးခဲ့၍ မတူပီမှ ပြန်လာသည့်စစ်ယာဉ်တန်းကို မင်းတပ် CDFက တိုက်ခိုက်ရာ၌ သေဆုံးသည့် စစ်ကောင်စီတပ်ဖွဲ့ဝင် ၁၄ဦးထက်မနည်းရှိပြီဖြစ်သည်။