ဂန့်ဂေါ – ဟားခါးလမ်းသို့ချီတက်လာသည့် စစ်ကြောင်းကို CDF၊ PDFတို့နှင့် အတူပူးပေါင်း တိုက်ခိုက်ခဲ့ဟု ထုတ်ပြန်
မကွေးတိုင်း ဂန့်ဂေါမှ ချင်းပြည်နယ် ဟားခါးမြို့သို့ ခြေလျင်ချီတက်လာသည့် စစ်ကောင်စီတပ်များကို ဧပြီ ၂၂ရက်မှ ၃၀ရက်အတွင်း အကြိမ်ကြိမ်ကြားဖြတ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၆၁ဦး သေဆုံးခဲ့ကြောင်း ချင်းအမျိုးသားတပ်ဦး/ချင်းအမျိုးသားတပ်မတော်(CNF/CNA) ကယနေ့ ထုတ်ပြန်သည်။
ဂန့်ဂေါမြို့မှ အင်အား ၂၀၀ခန့်ဖြင့်လာသည့် စစ်ကောင်စီတပ်ကို ဂန့်ဂေါ-ဟားခါး ကားလမ်းတစ်လျှောက်တွင် CNF/CNA ၊ ဟားခါးမြို့နယ် ချင်းကာကွယ်ရေးတပ်(CDF)၊ ထီးလင်းမြို့နယ် ပြည်သူ့ကာကွယ်ရေးတပ်(PDF) တို့ ပါဝင်သော ပူးပေါင်းတပ်က တိုက်ခိုက်ခဲ့ရာ အနည်းဆုံးငါးကြိမ်တိုက်ပွဲဖြစ်ခဲ့ရာ စစ်ကောင်စီတပ်မှ ၆၁ဦး သေဆုံးခဲ့သည်ဟု ဖော်ပြထားသည်။
အဆိုပါ တိုက်ပွဲများအတွင်း ချင်းကာကွယ်ရေးတပ်ဖွဲ့မှ ရဲဘော် နှစ်ဦး ကျဆုံးခဲ့သည်ဟု ဆိုသည်။
Public Service Announcement
ချင်းပြည်နယ်တောင်ပိုင်း မတူပီစစ်ဗျူဟာသို့ မကွေးတိုင်း ပခုက္ကူမြို့မှ အင်အားအလုံးအရင်းဖြင့် ချီတက်လာသော စစ်ကော်စီတပ်ဖွဲ့များအား မင်းတပ် CDFနှင့် မတူပီ CDF တို့က တိုက်ခိုက်ခဲ့ကြောင်း CNFက ထုတ်ပြန်သည်။ မတူပီသို့ စစ်အင်အားဖြည့်တင်းလာသည့် စစ်ကောင်စီယာဉ်တန်းကို မတ်လ ၂၆ရက်မှ ယနေ့အထိ CDF တပ်များက အကြိမ်ကြိမ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင်များ သေဆုံးခဲ့သည်။
တစ်ဖက်တွင်လည်း ချင်းပြည်နယ် မြောက်ပိုင်း ဟားခါးမှ ဖလမ်းမြို့နယ်သို့ သွားသည့် စစ်ကောင်စီတပ်ကိုလည်း CNA နှင့် CDF ပူးပေါင်းတပ်များက တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုများပြားခဲ့သည်။ ထို့အပြင် CNA နှင့် CDF ရဲဘော်များလည်းတိုက်ပွဲ၌ ကျဆုံးမှုရှိခဲ့သည်။
